El Conceyu de Mieres estudia recurrir la sentencia del TSXA qu'anula la ordenanza d'asturianu

L’anunciáu recursu del PP de Mieres a la ordenanza d’asturianu aprobada nel Plenu de marzu del 2018 salió finalmente alantre. El TSXA anula la norma al entender que ye una oficialidá encubierta y el Conceyu de Mieres ta anguaño estudiando recurrir la sentencia.

La ordenanza, que taba paralizada por Delegación del Gobiernu estatal n’Asturies, modificóse nel so momentu pa salvar les alegaciones del PP a la primera aprobada en mayu del 2017. D’esta forma pretendíase evitar que se pudiera torgar nos tribunales: “Ye la solución posible según el marcu llegal pa los conceyos, que ye la Llei d’Usu”, apuntó l’entós conceyal Faustino Zapico, qu’añadió que “nel casu de que se valtara nos tribunales quedaría amosao lo que yá sabemos; que la Llei d’Usu ye papel moyao”.

“Los conceyos asturianos podrán adoptar les midíes necesaries p’asegurar la efectividá del exerciciu de los derechos llingüísticos qu’esta Llei otorga a los ciudadanos residentes n’Asturies”, apunta l’artículu 8.1 de la Llei d’Usu y Promoción del Bable/Asturianu. Sicasí, el Tribunal Superior de Xusticia d’Asturies (TSXA) entiende la ordenanza d’asturianu de Mieres como una oficialidá encubierta, anulándola por considerar que los ayuntamientos nun tienen esta competencia.

Según fontes municipales, el Conceyu ta anguaño estudiando colos sos serviciu xurídicos les midíes a adoptar, cola posibilidá de recurrir la sentencia. “Tamos valorando qué facer”, apuntaron.