McCartney repasó n’El Molinón la historia de los Beatles

Con saludos a España, a la ciudá de Xixón y al Sporting, amás d'un "Puxa Asturies" del guitarrista Brian Ray, la banda del ex - beatle Paul McCartney entamó ayeri la so xira europea 2004 nel estadiu d'El Molinón énte más de 25.000 persones. A lo llargo de más de dos hores de recital, l'artista de Liverpool repasó la historia de los Beatles, el míticu grupu que-y dio reconocimientu mundial, anque tamién dexó dalgún güecu pa temes de Wings y otros de la so carrera en solitario.

El conciertu entamó precisamente con "Jet", ún de los temes de la etapa de Wings, pero nun foi hasta que llegó "All my loving" que la xente entamó a siguir al cantante. Un repasu a dellos temes en versión acústica (ahora estoy solo con vosotros, dixo en castellanu pa entamar esta riestra), ente los que rescampló "Blackbird" del álbum blancu de los Beatles, foi ún de los momentos en que más decayó'l recital, sobremanera pola mala calidá del soníu pa la parte d'atrás del estadiu. Pero darréu d'ello, Paul dexó la guitarra y garró'l baxu Fender de cuatro cuerdes col que se venceya siempre la so imaxe colos Beatles. Eso y "drive my car" foi abondo pa que'l conciertu garrare otra vuelta interés pa un públicu yá vencíu al cantante y qu'escuchó de siguío tolos grandes clásicos de los Beatles que lleven la firma de Paul: Lady Madonna, We can Work it out, Penny Lane, Back in USSR y otres, rescamplando, polo espectacular, la versión de "live and let die" el tema qu'escribiere McCartney pa la película de James Bond y que contó con un despliegue de medios apavoriante, con voladores y cañones de fueu nel escenariu. El crescendo de l'actuación, na que tolos temes respetaron dafechu la so apriencia orixinal en cuestión d'igües y orquestación, llegó a un final en que -cayía de caxón- McCartney cantó col públicu Hey Jude. Tres d'ello, los bises, qu'entamaron con Let it Be y remataron nun eléctricu Helter Skelter, echando'l piesllu cola despidida del Sergeant Peppers, el discu más psicodélicu de los Beatles.

Hasta ehí'l conciertu de dientro del estadiu, porque mientres el públicu abandonaba'l Molinón baxo un bastiazu de confetti, fuera del campu xixonés siguía una gran cantidá de xente que nun pudo entrar al conciertu y qu'acabó pasando la nueche alredor del estadiu. Ello foi que, como anunciáremos anteayeri n'Asturies.com, delles cases comerciales repartieren entraes pal conciertu a los sos veceros, destacando la promoción que fizo Movistar. La casa de móviles punxo una taquilla pa despachar los miles d'entraes que tenía, pero la falta d'organización pa montar la cola y de personal p'atender a los agraciaos llevó a una situación caótica, viéndose bien ceo que diba ser imposible repartir toles entraes nun tiempu razonable. A les 10 y media de la nueche, col conciertu pa entamar, a la montonera de xente que taba a l'altura de la puerta 10 acabóse-y la paciencia cuando la taquilla que regalaba les entraes peslló delantre de les más de 500 persones qu'entovía nun pudieren garrar entrada. De nada nun valieron les protestes, que les hubo, y a tolos niveles. La centralina de llamaes de la casa de móviles estragóse darréu de llamaes de xente quexándose a les que los operadores de Movistar retrucaben argumentando que "nun teníen constancia de la esistencia de tala promoción" y que'l númberu al traviés del que se fizo la promoción "nun pertenez a Movistar".