Los senadores asturianos que refugaron una partida pa l’ALLA pudieron evitar la votación en bloque

La enmienda de Compromís pa que l’Academia de la Llingua Asturiana (ALLA) recibiera una partida de los PXE, como’l restu d’academies de les llingües del Estáu, tuvo’l refugu de los seis senadores asturianos. Éstos nun solicitaron la votación individual de la mesma, polo que se fixo en bloque, escusa emplegada nel 2017.

“Les agrupaciones en bloque de les enmiendes decídenles tolos senadores. Si los senadores asturianos quixeran votar esa enmienda sola, pídese pola aplicación de la Intranet y se separta ensin problemes”, esplica’l senador valencianu Carles Mulet, que recuerda que la enmienda que reclamaba 100.000 euros de los Presupuestos Xenerales del Estáu pa l'ALLA “ye la mesma que la del añu pasáu, cuando dalgunos se disculparon por que nun s’enteraren de que la presentáremos. Agora taben avisaos y nin asina”. Rosa Domínguez de Posada, de Foro, foi la que pidió “escuses” nel 2017 por esti motivu, senadora qu’ayeri tornó a votar en contra xunto col restu de representantes del pueblu asturianu na Cámara Alta: la socialista María Luisa Carcedo y el popular Fernando Goñi, por designación de la Xunta Xeneral; y el socialista Vicente Álvarez Areces y los populares Mario Arias y Ovidio Sánchez, por eleiciones.

Según recueye Europa Press, dende la FSA argumenten que’l motivu de los sos dos votos en contra a la enmienda vieno pol compromisu del presidente Pedro Sánchez na moción de censura de nun modificar los presupuestos ellaboraos pol saliente Mariano Rajoy y aprobaos nel Congresu. D’igual forma, esponen que na Cámara Baxa presentaren un enmienda a los PXE que pidía 250.000 euros pa l’ALLA que tamién foi refugada.

EAJ-PNV y PDeCAT, astuviéronse

Nel Senáu, la propuesta de Compromís tuvo’l sofitu de 35 senadores, los de Xuníos Podemos-En Comú Podem-En Marea, ERC y EH Bildu, mentes que s’astuvieron 14, los d’EAJ-PNV, PDeCAT, Agrupación Socialista Gomera, Coalición Canaria, Nueva Canarias y Agrupación Herreña Independiete. En contra votaron 205, los de Foro, el PP, el PSOE y Ciudadanos.

Otra manera, al igual que fixeron los senadores asturianos, los estremeños refugaron colos sos votos una partida simbólica de 10.000 euros a favor del estremeñu.