Compromís va presentar una enmienda a los PXE pa que l’ALLA tenga tamién financiación estatal

La formación valenciana Compromís va presentar, al igual que l’añu pasáu, una enmienda a los Presupuestos Xenerales del Estáu pa qu’incorporen una partida pa l’Academia de la Llingua Asturiana (ALLA). La institución ye la única academia esistente de les llingües estatales que nun recibe financiación dende Madrid.

Carles Mulet, senador que vien mientres tola llexislatura sofitando al asturlleonés dende la Cámara Alta, ta acabante de confirmar esti pasu, que yá dio nel 2017. Naquella ocasión el PP valtó la enmienda, que contó tamién col votu contrariu de Foro. Rosa Domínguez de Posada tuvo que salir dando esplicaciones por esta posición, escudándose en que toles enmiendes de Compromís votáronse en bloque.

Iniciativa pol Asturianu asoleyaba’l llunes un comunicáu nel que solicitaba a toles fuercies polítiques que sofitaren la creación d’una partida pa l’ALLA, inclusive al PP, yá que nun ye necesario que la llingua asturiana sía oficial pa ello y asina esta formación podría “demostrar que daveres nun ta en contra del asturianu”. L'Institut d'Estudis Catalans (283.070 euros l’añu pasáu), la Real Academia Galega (283.070) y la Euskaltzaindia (153.180), la Real Academia Española (1.661.290, amás d’otres partíes pa proyeutos concretos) y la Comisión Permanente de l’Asociación de Academias de la Lengua Española (76.050) reciben perres del Estáu.

Descalificación de Domínguez de Posada

Domínguez de Posada vien de protagonizar precisamente una polémica con Mulet pola presentación d’una enmienda por parte del valencianu a la moción de Foro pa la emisión d’una moneda y tres sellos conmemorativos del triple centenariu de Cuadonga. La posición de Compromís ye que l’Estáu, al ser aconfesional, nun debe conmemorar “la coronación de la Virxe de Cuadonga o del supuestu orixe del Reinu d’Asturies y de la España moderna con Don Pelayo, lleenda ensin nengún rigor y reprochada polos historiadores”, espliquen dende la formación.

“Ye dalgo que recuerda al nacionalcatolicismu”, apuntó’l senador, que solicitó midíes más positives p’Asturies y l’usu nos sellos de la llingua asturiana. D’igual forma, anunció que va presentar una quexa ante la Presidencia del Senáu pola actitú de Pedro Sanz, vicepresidente de la Cámara, al permitir que Domínguez de Posada afalara-y “a dir al psiquiatra” pola so postura énte la moción de Foro.