González Riaño agradez-y a Mulet el so “compromís” pa cola llingua asturiana

El presidente de l’ALLA, Xosé Antón González Riaño, agradeció per carta al senador valencianu Carles Mulet pol so “compromís” pa cola llingua asturiana. Compromís presentó esti añu y l’anterior una enmienda a los PXE pa incorporar una partida de 100.000 euros pa la institución que refugaron los senadores asturianos.

Fechada el 20 de xunu, la carta comienza con un “quixere agradece-y mui de veres, un añu más, el so ‘compromís’ cola llingua asturiana y cola institución que presido”. Darréu González Riaño desea al senador “los meyores llogros nesta etapa de la llexislatura” na qu’aguarda que “ente toos algamemos que la llingua asturiana tenga’l mesmu tratu que la Constitución afita pa toles llingües del Estáu”.

Mulet amosó en redes sociales la so satisfaición por esti agradecimientu destacando que “l’Academia de la Llingua Asturiana (ALLA) allegróme’l dia, ente toos y toes vamos consiguir la oficialidá”. El valencianu y la so formación vien amosando mientres tola llexislatura un compromisu pa col asturlleonés, emplegándolu nes sesiones y presentando delles iniciatives a favor del idioma.

Ente elles destaca la enmienda a los Presupuestos Xenerales del Estáu (PXE) del PP na Cámara Alta pa la inclusión d’una partida pa l’ALLA a cargu de les cuentes estatales, al igual que reciben les academies esistentes d’otres llingües: l'Institut d'Estudis Catalans (283.070 euros), la Real Academia Galega (283.070) y la Euskaltzaindia (200.000). Pela so parte, la Real Academia Española (RAE) ingresó nel 2017 1.661.290 euros –amás d’otres partíes pa proyeutos concretos– y la Comisión Permanente de l’Asociación de Academias de la Lengua Española, 76.050.

Nel casu del asturianu la cantidá solicitada yera de 100.000 euros. Los seis senadores asturianos, del PP, Foro y PSOE, al igual que l’añu pasáu, refugáronlo.