Compromís presenta una enmienda nel Senáu p'ampliar en 100.000 euros la partida pa l'ALLA

|
Carles Mulet nel Senáu con cartelu Iniciativa pol Asturianu

Los Presupuestos Xenerales del Estáu destinen perres per primer vegada a la institución, un total de 40.000 euros.

Carles Mulet rexistró esti martes, coincidiendo col cuarentenu aniversariu de l'Academia de la Llingua Asturiana (ALLA), una enmienda a la seición 18 de los PXE pa que los 40.000 euros que va recibir aumente n'otros 100.000, mesma cantidá que reclama pa l'Acadèmia Valenciana de la Llengua. Nun ye la primer vegada que Compromís amuesa esti sofitu a l'ALLA y a la llingua asturiana solicitando financiación estatal pa esta entidá na Cámara Alta, siempre ensin apoyu de los senadores asturianos.

"Avanzar na cooficialidá del asturianu a tolos niveles sería tremendamente positivo pa toles llingües y cultures del nuesu Estáu", espresa Mulet, qu'añade que, "anque sían partíes modestes, pensamos que l'Estáu, igual que financia entidaes que promueven el castellanu, debería d'implicase na promoción y proteición de toles llingües españoles pa cumplir de facto con aquello que blinda la Constitución respeuto al valor d'estes llingües". Al empar, felicitó a l'ALLA pol so aniversariu y llabor, y apuntó que "oxalá la clase política fora más valiente y destinara más recursos a esta academia".

Tamién naguó por que, una vegada algamada la oficialidá, pudiera sentir l'asturianu na tribuna del Senáu, "igual que facemos col castellanu, valencianu, vascu o gallegu". "Que depués de tantos años de Democracia entovía haya llingües ensin esti status esmolez a los que defendemos precisamente una visión del Estáu plural, diversa y rica culturalmente", finó'l políticu de Castelló.

Na semeya, Mulet nel Senáu sofitando la oficialidá con un cartelu d'Iniciativa pol Asturianu.

Contador Estadistiques