Asturies insiste nel zarru perimetral en Selmana Santa, mesma postura que defende'l ministeriu

Va plantegase que los estudiantes nun tornen a casa nes vacaciones. Esti miércoles rexistráronse 135 contaxos y 7 muertes.

Pablo Ignacio Fernández Muñiz, conseyeru de Salú, defendió ayeri nel Conseyu Interterritorial del Sistema Nacional de Salud qu'haya un zarru perimetral provincial en Selmana Santa y "otru tipu de midíes que torgue una gran movilidá y qu'haya un escesu d'interactividá social", porque "les midíes que nun se faigan nuna comunidá tienen influencia nel restu". La presencia de la variante inglesa, que nel país yá ta ente un 80 y un 90 por cientu, lo que ta provocando que'l descensu de casos sía más lentu, ye'l principal argumentu qu'espón Asturies.

El Ministeriu de Sanidá defende la mesma postura que Fernández Muñiz y va llevar a la Comisión de Salú Pública, formáu pol propiu ministeriu y los direutores xenerales de Salú Pública, pal so alderique una propuesta de midíes comunes pa Selmana Santa, que se ratificarán el miércoles nel próximu Conseyu Interterritorial, ente les que rescampla la prohibición de los estudiantes de tornar a casa pa les sos vacaciones. Tamién el caltenimientu del toque de queda y reducir los aconceyamientos públicos y privaos a ente 4 y 6 persones en toles autonomíes.

Segundu día de descensu

A falta de la espublización de los datos oficiales de la COVID-19, la Conseyería de Salú informó de la detección ayeri de 135 contaxos –finalmente son 134 por un duplicáu de díes anteriores–. Son 15 menos que'l martes, cuando hebo 150, anque l'actualización aumentó'l total a 151.

El Serviciu de Salú del Principáu d'Asturies (SESPA) fixo 3.873 pruebes de diagnósticu d'infeición activa, polo que la tasa de positividá s'asitia nun 5,27 por cientu, superior a la del día anterior, cuando quedó nun 5,16 por cientu. A 7 díes, esti porcentaxe yera ayeri del 5,85 por cientu –los datos definitivos de la xornada déxenlu en 5,86 por cientu ayeri–.

Hai que llamentar 7 muertes na xornada: cuatro homes de 89, 85, 65 y 60 años y trés muyeres de 96, 88 y 79. Dende qu'entamó l'andanciu finaron cola enfermedá causada pol coronavirus SARS-CoV-2 un total de 1.789 persones.

274 pacientes tán hospitalizaos con confirmación o sospecha de COVID-19, a los qu'hai que sumar 103 que tán na UCI. Son 4 y 5 menos que'l martes, de manera respeutiva.

Corvera abre la movilidá

Mes y mediu depués, Corvera llevanta'l zarru perimetral. Esti conceyu entrara nel nivel d'alerta 4+ el 19 de xineru xunto con Avilés y Castrillón, que salieron del riesgu estremu, el domingu y el martes, de manera respeutiva, y adopta agora les midíes comunes al restu del país tres ameyorar los sos datos.

Namái queden coles restricciones más dures Ḷḷena y Piloña, que finen el domingu y el llunes, polo que la so situación va revisase estos díes. Pa consultar los indicadores de tolos conceyos y les midíes vixentes en caún d'ellos l'Observatoriu de Salú n'Asturies tien activu un mapa na so web, na pestaña 'Mapas medidas'.

24 biltos activos

Asturies informó al Ministeriu de Sanidá de la esistencia de 24 biltos activos, 9 menos qu'hai una selmana, con un total de 275 casos. 7 d'ellos detectáronse estos 7 díes últimos, comunica la conseyería.

Na semeya, la direutora xeneral de Política y Planificación Sanitaries, Lidia Clara Rodríguez; el conseyeru Fernández Muñiz; la direutora xeneral de Calidá, Tresformación y Xestión del Conocimientu, Elena Llorente; y el direutor xeneral de Cuidaos, Humanización y Atención Sociosanitaria, Sergio Valles.