Los contaxos baxaron a 1.174 diarios de media na selmana pasada

El Conseyu Territorial ratifica la propuesta del ministeriu de quitar la obligatoriedá del usu de mázcara nel esterior dende'l xueves.

La curva de la quinta fola sigue en descensu. Per tercer selmana baxen los contaxos, que s'asitien en 1.174 diarios de media la selmana pasada, polos 1.831 de l'anterior.

Entamó la selmana con 174.017 casos confirmaos –nun primer momentu comunicáronse 173.331– y finó con 182.234, polo que se sumaron 8.217, lloñe de los 22.003 del periodu del 10 al 17 de xineru. Estos trés díes últimos la Conseyería de Salú informó de 2.477 casos nuevos: 1.160 el vienres, 819 el sábadu y 498 ayeri.

Dende qu'Asturies.com vien rexistrando la media de contaxos diarios nel periodu d'una selmana, a lo último d'agostu del 2020, esti datu evolucionó asina: 39, 46, 52, 83, 92, 92, 150, 210, 272, 334, 408, 508, 344, 252, 194, 125, 101, 78, 101, 167, 292, 421, 482, 383, 226, 154, 135, 144, 113, 113, 119, 115, 121, 126, 115, 84, 52, 49, 53, 51, 50, 55, 51, 57, 196, 448, 493, 423, 289, 194, 133, 77, 60, 42, 20, 12, 13, 11, 13, 17, 22, 32, 29, 70, 175, 322, 427, 632, 1.032, 1.905, 2.355, 3.143, 2.538 y 1.831, hasta los 1.174 actuales.

11 finaos

Estos díes perdieron la vida cola enfermedá causada pol coronavirus SARS-COV-2 un total de 11 persones: 3 muyeres de 95, 90 y 56 y 2 homes de 87 el vienres; un home de 86 y una muyer de 81 el sábadu; y 3 muyeres de 90, 77 y 71, y 1 home de 88, ayeri. Dende qu'entamó l'andanciu la cifra de finaos llega a 2.351.

El númberu d'hospitalizaos queda en 373, con 342 pacientes en planta y 31 na UCI. Son 5 y 3 menos que'l xueves, de manera respeutiva.

Aumentu d'aforos

El Conseyu de Ministros va aprobar mañana'l Real Decretu pol que van dexar de ser obligatories les mázcares n'esterior dende'l xueves. La decisión del Ministeriu de Sanidá ratificóla esta mañana'l Conseyu Interterritorial del Sistema Nacional de Salud.

"Paeznos bastante razonable que yá nun tea en vigor la obligatoriedá del usu de mázcares en tou momento n'esterior", esplicó Pablo Ignacio Fernández Muñiz, conseyeru de Salú, que recordó qu'ésta va siguir siendo necesaria n'eventos multitudinarios o cuando nun se cumpla la distancia de seguranza de 1,5 metros. D'igual forma, Sanidá y les autonomíes alcordaron aumentar la llende d'aforu del 75 al 85 por cientu n'espacios abiertos y del 50 al 75 en zarraos pal públicu de competiciones deportives.