La evolución de la pandemia permite l’entamu de “la fase de desescalada” sanitaria

La baxada de la incidencia y de los ingresos hospitalarios con COVID-19 lleva al SESPA a entamar con “la fase de desescalada” sanitaria pa reorganizar los recursos humanos esistentes, disminuyendo puntos de vacunación y autocovid. La selmana pasada rexistróse una media de 756 contaxos diarios, polos 1.174 y 1.831 de les dos anteriores.

La direutora xerente del Serviciu de Salú del Principáu d’Asturies (SESPA), Concepción Saavedra, confirmó esta mañana na Comisión de Salú de la Xunta Xeneral un pasu nuevu p’adaptase a la situación nueva que marca la pandemia y siguir avanzando hacia la ‘normalidá nueva’. “Hebo una disminución importante de la incidencia y al empar viose una disminución de los ingresos hospitalarios, y sobre manera daqué que nos esmolecía que yera la UCI, que paecía que diba más lenta, pero qu’esta selmana tuvo un descensu claru”, apuntó llueu d’un pidimientu d’información d’Adrián Pumares, diputáu de Foro, sobre l’estáu actual d’hospitales y les UCI.

Les previsiones ye qu’esta tendencia siga, polo que “vamos entamar yá la fase de desescalada”, confirmó. Asina, dende la xerencia yá se ta falando coles diferentes árees sanitaries “pa facer una reorganización de los recursos humanos”, disminuyendo los puntos de vacunación y los autocovid, lo que va permitir l’aumentu de consultes y pruebes nos centros hospitalarios.

A día d’ayeri había 309 pacientes ingresaos con confirmación o sospecha de COVID-19, cuando’l xueves la cifra taba en 311 y hai una selmana, en 373. De los pacientes actuales 281 tán en planta, 3 menos, y 28 na UCI, 1 más.

La ocupación total por esta patoloxía ye del 8,84 por cientu en planta y na UCI del 9,42 por cientu.

1.764 casos y 12 finaos esta fin de selmana

Estos trés últimos díes detectáronse 1.764 casos nuevos: 817 el vienres, 523 el sábadu y 424 ayeri. L’anterior comunicáronse 2.477, confirmando asina’l descensu de casos que se vio a lo llargo de la selmana.

Ésta principió con 182.583 positivos confirmaos –nun primer momentu la cifra dada pola Conseyería de Salú yera 182.234– y finó con 187.878. Son 5.295 casos nuevos, cuando nel periodu anterior rexistráronse 8.217.

La media de contaxos diarios queda en 756. Desque Asturies.com vien rexistrando esti datu, a lo último d'agostu del 2020, ésti evolucionó asina: 39, 46, 52, 83, 92, 92, 150, 210, 272, 334, 408, 508, 344, 252, 194, 125, 101, 78, 101, 167, 292, 421, 482, 383, 226, 154, 135, 144, 113, 113, 119, 115, 121, 126, 115, 84, 52, 49, 53, 51, 50, 55, 51, 57, 196, 448, 493, 423, 289, 194, 133, 77, 60, 42, 20, 12, 13, 11, 13, 17, 22, 32, 29, 70, 175, 322, 427, 632, 1.032, 1.905, 2.355, 3.143, 2.538, 1.831 y 1.174, hasta los 756 actuales.

Na fin de selmana hebo que llamentar 12 muertes: 5 el vienres (3 homes de 88, 87 y 85 años y 2 muyeres de 87 y 55), 6 el sábadu (2 homes de 88 y 76, y 4 muyeres de 86, 75, 67 y 57) y 1 ayer (1 home de 88). No que va d’andanciu’l númberu de finaos cola enfermedá causada pol coronavirus SARS-COV-2 un total de 2.378 persones –llueu de sumar a la serie 2 non contabilizaos nos díes previos–.

Na semeya, Saavedra; Pablo Ignacio Fernández Muñiz, conseyeru de Salú; Lidia Clara Rodríguez, direutora xeneral de Salú Pública; y Sergio Valles, direutor xeneral de Política y Planificación Sanitaries.