Sigue la baxada de contaxos, con una media de 1.831 diarios

|
Delia Losa y Pablo Ignacio Fernández Muñiz en Viroloxía del Llaboratoriu de Microbioloxía del HUCA

Estúdiense 4 posibles casos más de la variante ómicron silenciosa del coronavirus SARS-COV-2.

El día 21 Asturies algamó'l picu d'iincedencia acumulada a 14 díes de la quinta fola y de tol andanciu. Algamábense 4.007,14 casos por 100.000 habitantes, cuando'l récor hasta'l momentu taba nos 684,15 del 20 de xunetu,na cuarta fola.

La tendencia dende hai 10 díes ye descendente, como amuesa la baxada a 3.462,27 na actualización de datos oficiales últimos, correspondiente al xueves. Esta selmana pasada rexistráronse 12.820 casos, al pasar de 160.511 –llueu d'una revisión, yá que nun primer momentu s'informó de 159.880– a 173.331, polos 17.763 comunicaos l'anterior.

Son 1.831 contaxos diarios de media neste xornaes previes, que suponen una baxada con respeuto a los los 2.538 del periodu del 17 al 23 de xineru y los 3.143 del 10 al 16, techu del andanciu. Dende qu'Asturies.com vien rexistrando esti datu, a lo último d'agostu del 2020, ésti evolucionó asina: 39, 46, 52, 83, 92, 92, 150, 210, 272, 334, 408, 508, 344, 252, 194, 125, 101, 78, 101, 167, 292, 421, 482, 383, 226, 154, 135, 144, 113, 113, 119, 115, 121, 126, 115, 84, 52, 49, 53, 51, 50, 55, 51, 57, 196, 448, 493, 423, 289, 194, 133, 77, 60, 42, 20, 12, 13, 11, 13, 17, 22, 32, 29, 70, 175, 322, 427, 632, 1.032, 1.905, 2.355, 3.143 y 2.538, hasta los 1.831 actuales.

Esta fin de selmana los positivos detectaos foron 3.966, que certifiquen tamién el cambiu de tendencia d'esta quinta fola, yá que l'anterior comunicáronse 6.374. El vienres rexistráronse 1.874, el sábadu 1.176 y ayeri 916.

17 finaos

La nota negativa d'estos trés díes foi l'altu númberu de finaos, un total de 17, que ponen l'acumuláu del andanciu en 2.306. El vienres fixéronlo 8 persones (3 muyeres de 99, 94 y 88 años, y 5 homes de 93, 89, 77, 77 y 73), 5 el sábadu (2 muyeres de 93 y 92, y 3 homes de 79, 79 y 71) y 4 ayeri (3 homes de 95, 55 y 49, y 1 muyer de 86).

Hai hospitalizaes 471 persones, lo que supón 17 más que'l xueves, cuando taben ingresaes 454. Siguen 49 cames UCI ocupaes, mentes que l'aumentu dase en planta, onde s'alcuentren 422 pacientes

La ocupación total por esta patoloxía ye del 13,44 por cientu y del 15,96, de manera respeutiva.

Nun xenera una enfermedá más grave

El vienres detectóse'l primer casu d'ómicron silenciosa n'Asturies y esta mañana'l conseyeru de Salú, Pablo Ignacio Fernández Muñiz, informó qu'había otros cuatro casos sospechosos pendientes de confirmación. "Tovía ye pronto, hai bastante incertidume, pero realmente nos países onde hebo más casos viose una carauterística: la tresmisión con más facilidá que la ómicron. Nun se ta viendo que tenga una mayor gravedá nin que s'escape especialmente más que la ómicron a la inmunidá", espresó sobre esta variante nueva.

Na semeya, Delia Losa, delegada del Goibiernu estatal n'Asturies, y Fernández Muñiz, nuna visita esta mañana a la seición de Delia Losa y Pablo Ignacio Fernández Muñiz en Viroloxía del Llaboratoriu de Microbioloxía del HUCA p'agradecer el llabor de los trabayadores.

 

Contador Estadistiques