Los conseyeros de Salú y el ministeriu ratifiquen les torgues a la movilidá en Selmana Santa

El criteriu que defendía Asturies ye'l mayoritariu al atopar la oposición única de la Comunidad de Madrid. Esti miércoles baxóse de los 100 contaxos, con una positividá del 3,63 por cientu.

El Conseyu Interterritorial del Sistema Nacional de Salud dio validez a les propuestes de la Comisión de Salú Pública, polo que va haber actuaciones coordinaes de cara a la Selmana Santa en tol Estáu. Ente les midíes mínimes, que podrán ser endurecíes poles autonomíes, rescampla la prohibición de la movilidá ente territorios, cola esceición única de les islles.

Del 26 de marzu al 9 d'abril –tamién del 17 al 21 de marzu onde San Xosé ye festivu– el toque de queda va quedar afitáu de 23 a 6 hores, límitense los aconceyamientos n'espacios públicos zarraos a un máximu de 4 personas y de 6 n'abiertos, y prohíbense los axuntamietos en domicilios ente non convivientes. Nel casu d'Asturies namái inflúi ésti puntu últimu, yá que los restantes yá tán activos y el confinamientu nocherniegu ye entá más duru, dende les 22 hores.

“Tamos énte una situación mui esmoleciente y hemos algamar qu'esta meseta que se ta formando se convierta otra vuelta nun descensu o, polo menos, torgar un ascensu'l mayor tiempu posible pa poder siguir vacunando, sobre manera, a les persones más vulnerables, los mayores de 80 años”, espresó'l conseyeru Pablo Ignacio Fernández Muñiz. Respeuto a la campaña, confirmó que'l 5 por cientu de la población del país yá recibieron la pauta completa.

96 positivos

A falta de la espublización de los datos oficiales de la COVID-19, la Conseyería de Salú informó ayeri de 96 contaxos. Son 6 menos que la xornada anterior.

Nuna selmana d'ameyoramientu de los datos tres la frenadura del descensu de los indicadores provocada pol predominiu de la variante inglesa del coronavirus SARS-CoV-2, la tasa de positividá sigue baxando. Na xornada última, cola realización de 4.132 pruebes de diagnósticu d'infeición activa, rexistróse un 3,63 por cientu, cuando'l día anterior foi del 4,02 por cientu y el porcentaxe, a 7 díes, taba nun 5,02 por cientu –cola actualización ayeri baxó al 4,78 por cientu–.

Hai que llamentar la muerte de cuatro homes de 88, 81, 80 y 76 años. Dende qu'entamó l'andanciu son yá 1.809 les persones que perdieron la vida n'Asturies.

El númberu d'hospitalizaos con confirmación o sospecha de COVID-19 queda en 238, 4 más que'l martes. Mentes, na UCI tán ingresaos UCI 102 pacientes, ún menos que'l día anterior.

25 biltos activos

Asturies informó al Ministeriu de Sanidá de la esistencia de 25 biltos activos, ún más qu'hai una selmana, con un total de 294 casos. 9 d'ellos detectáronse estos 7 díes últimos, comunica la conseyería.

Na semeya, Fernández Muñiz nun momentu de la xunta telemática del Conseyu Interterritorial del Sistema Nacional de Salud d'ayeri.