La tasa de positividá diaria baxa al 3,48 por cientu nuna xornada con 102 contaxos de COVID-19

|
Ponte de Cangues d'Onís

Actívase'l zarru perimetral en Cangues d'Onís nel día nel que s'acumulen trés selmanes ensin biltos en residencies de mayores.

A falta de la espublización de los datos oficiales de la COVID-19, la Conseyería de Salú comunicó la detección de 102 casos nuevos ayeri. Ye ún menos que'l día anterior, cuando hebo 103.

La tasa de positividá diaria asitióse perbaxo del 4 por cientu, un 3,49 por cientu, tres la realización de 4.225 pruebes de diagnósticu d'infeición activa. El llunes foi del 4,02 por cientu, xornada na que, a 7 díes, esti porcentaxe taba nun 5,28 por cientu –cola actualización baxó ayeri al 5,02 por cientu–.

Una muyer de 94 años finó ayeri cola enfermedá causada pol coronavirus SARS-CoV-2. D'esta forma, son yá 1.805 les persones que perdieron la vida dende que principió l'andanciu.

Hai 234 hospitalizaos con confirmación o sospecha de COVID-19, 23 menos que'l día anterior. Na UCI siguen 103 pacientes.

3 conceyos en nivel d'alerta 4+

Güei activáronse les midíes del nivel d'alerta 4+ en Cangues d'Onís tres la entrada del conceyu en riesgu estremu. Ente elles rescampla'l zarru perimetral y el pieslle de los interiores de los chigres.

D'esta forma son 3 los conceyos con restricciones mayores, yá que nesta llista siguíen Ḷḷena y Piloña. Pa consultar los indicadores de tolos llugares y les midíes vixentes en caún d'ellos l'Observatoriu de Salú n'Asturies tien activu un mapa na so web, na pestaña 'Mapas medidas'.

Diez positivos en centros sociosanitarios

Salú nun detectó nes residencias de persones mayores biltos de coronavirus, lo qu'implica más de trés casos, per tercer selmana siguida. En concreto, del 2 al 8 de marzu rexistráronse 10 positivos n'otros tantos centros sociosanitarios de los 270 qu'esisten n'Asturies, asina como 10 finaos con domiciliu nellos.

Na semeya, ponte de Cangues d'Onís.

Contador Estadistiques