Los asturianos siguen apostando mayoritariamente pola oficialidá del asturianu

El 53 por cientu sofita la oficialidá según l'avance de la III Encuesta Sociollingüística d’Asturies.

Francisco José Llera Ramo, direutor del Euskobarómetro y responsable d’esta encuesta, xunto col nuevu presidente de l’Academia de la Llingua Asturiana, Xosé Antón González Riaño, presentaron esta mañana nel llar de la institución académica un avance de la III Encuesta Sociollingüística d’Asturies.

Ésta ye la tercer edición d'estos estudios que son fundamentales pa conocer la percepción y evolución del idioma ente los asturianos y, asina, definir les polítiques en materia llingüística a aplicar (normalización, escolarización, comunicación, etc). La intención yera realizar una encuesta sociollingüística n’Asturies cada decada, pero yá pasaron quince años dende l’anterior, que foi nel 2002, siendo la primera nel 1991. Nesta ocasión nun s’aporten datos de la fastera Navia-Eo por motivos de presupuestu, encamentando dende l’ALLA al Gobiernu recursos o qu'encarguen ellos mesmos esta encuesta.

La encuesta ellaborose a traviés de 600 entrevistes realizaes nel domiciliu del encuestáu ente la población asturiana mayor de 16 años y realizaes ente’l 30 de marzu y el 23 d’abril de 2017.

Nel avance presentáu dan un panorama que “faenos ser moderadamente optimistes cola supervivencia del asturianu” según el director d’esti estudiu Llera Ramo, ya que tenemos una “clara recupación con claroscuros”.

L’informe entama cola identidá llingüística asturiana, na que se caltién el consensu mayoritariu sobre la identidá llingüística asturiana al considerar un 65% que la fala vernácula d’asturies ye “l’asturianu, bable o llingua asturiana”. Sicasí, vese un aumentu na opción de variedaes locales.

La falta d’oficialidá vese reflexada na entruga de comparación del asturianu coles otres llingues reconocies n’España, yá que, anque la mayoría de los asturianos (un 53%) considera que la so llingua ye igual a les demás, vese un fuerte retrocesu en comparación colos estudios anteriores (-18 puntos). Alcontrando los responsables del estudiu que la causa d’esti baxón nos que rechacen esta comparanza (43%), ye causada pola falta d’oficialidá del nuesu idioma, cosa que nun ocurre coles otres llingues. Sicasí , caltiense intactu la demanda de cuasi 8 de cada 10 entrevistaos de que’l tratu institucional y social al asturianu tien que ser igual al restu de llingues.

Otru datu que rescampla nel informe ye la desapaición progresiva del ‘estigma’ llingüísticu de los asturianos al considerar un 88% que falar n’asturianu nun ye falar mal.

Quiciabes, el puntu que más puede llamar l’atención nesta edición de la encuesta ye’l nivel de conocimientu del idioma entre los asturianos y la comparativa que se puede facer a lo llargo de los distintos estudios realizaos. Si partimos d’una encuesta realizada en 1983, cola participación tamién de Llera Ramo y qu’incluyía esta mesma entruga, tenemos que na encuesta realizada nel añu 1991 destacaba l’avance nel númberu de falantes potenciales o pasivos, en xeneral, y na segunda nel añu 2002 tien la meyora na alfabetización y la comprensión. Nesta tercera ye la escritura lo qu’avanza más significativamente. Pasando d’un 12% de falantes escasamente alfabetizaos nel 83, a un 62% de falantes nel 2017, y más de la meta alfabetizaos (38%). Pasando’l nivel de falantes potenciales del 40% nel 1983 al 90% anguaño.

La esperiencia alfabetizadora ye satisfactoria pa la mayoria de los que la vivieron directa o indirectamente (70%). Poro, ye mayoritariu la percepción d’alloñamientu ente la llingua estudiada y la falada normalmente. Según l’avance de la encuesta esto ye debío a la situación diglósica y el llentu procesu de normalización social del asturianu.

Otru de los datos que dentaquen los responsables de la Encuesta ye que gracies al procesu d’alfabetización escolar pudo compensase’l relevu xeneracional entre los falantes, detectandose una estabilización na percepción del usu cotidianu del asturianu ente los encuestaos. Anque l’asturianu sigue siendo la llingua preferente pa relacionase (ente’l 40% y el 56%) vese un aumentu del usu del asturianu na última década.

Tamién na última década, a diferencia de l’anterior, muestra una ñidia recuperación de la tresmisión llingüística interxeneracional con un aumentu de 13 puntos nos que tuvieron al asturianu como llingua familiar na infancia (34%) o castellanu y asturianu (20%). Pa los que declaren que foi solo en castellanu ye un 42%.

La percepción que tienen los asturianos en relación a la supervivencia del asturianu, según la Encuesta, puede considerase de “moderada recuperación del optimismu sobre’l futuru inciertu del asturianu” ya que les posiciones optimistes y condicionaes avanzaron nos caberos años.

Tamién la pregunta sobre la llingua propia d’Asturies muestra unos resultaos llamativos al comparalos cola anterior. Baxa la opinión de los que consideren que l’asturianu y castellanu son les dos les llingues propies d’Asturies (34%) y xuben los que consideren que ye l’asturianu (36%), y el castellanu (29%) . Aspirando según l’estudiu a un futuru billingüísmu equilibráu ente les dos llingues (49%).

Ye de destacar tamién que’l 51% gustaria-yos que los sos fios deprendiesen asturianu, frente al 19% que refuga esta posibilidá.

Otru de los apartaos d’esti avance de la Encuestra presentada, refierese a la demanda de la presencia del asturianu nos medios de comunicación impresos. La demanda d’un mediu impresu dafechu n’asturianu ye del 45%.

Tamién demanden una presencia temática más amplia y variada na RTPA qu’incluyera espacios deportivos, informativos, magazines, etc,. (58%). Y los que siguen los programas n’asturianu (43%), valoren la so calidá (86%) y sobre manera la so facil comprensión (91%).

Los datos de la Encuesta indica que la mayoría cuestiona la política llingüística autonómica considerando que faen poco (27%), pueden facer más (23%) y nun faen nada un (14%). Frente a los piensen que faen tolo que pueden 12%. (+NS/NC 24%)

Los datos d’esti avance traen otru datu y ye que’l 57% de los asturianos siguen apostando pol asturianu comun o normalizáu pero respetando les variantes y ensín artificialidá. Llama l’atención l’aumentu nesta edición de los partidarios del caltenimientu de les fales locales (25%).

Dempués de quince años, güei son más y de forma casi mayoritaria (48%) los que demanden polítiques más actives de recuperación llingüística. Frente a estos tenemos un 36% que se conformen con que pueda aprendelu quien quiera (36%), dexalu a la so propria inercia (12%), o abandonalu (1%).

Ye interesante los datos qu’aporta la cuestón sobre l’asturianu na escuela. Siendo un 91% favorable a la so presencia, ya seya como asignatura optativa (70%) o como una asignatura más (21%). Tamíen dexa afitao que una mayoría de los asturianos (52%) quier asignatures n’asturianu. Demandando, por tanto, una enseñanza billingüe. En pallabres del profesor Llera Ramo, taríemos falando del modelu B d’enseñu nel País Vascu.

L’avence del estudiu zarrase cola cuestión de la oficialidá onde dan unos datos en que la mayoría (53%) demanda la oficialidá del asturianu. Con los contrarios (25%) y los indiferentes (20%)

La Encuenta completa ta previsto asoleyala pa la seronda, diendo de les Xornaes d’Estudiú qu’entama tolos años l’Academia de la Llingua Asturiana.

Nesti enllaz puede consultase l'avance de resultaos presentáu d'esta III Encuesta Llingüística d'Asturies.