Un 53 por cientu de los llectores ve pocos avances granibles na III Encuesta Sociollingüística d'Asturies

Los usuarios d’Asturies.com que participaron en ‘Conceyu Abiertu’ nun se mostraron mui optimistes colos resultaos del avance de la III Encuesta Sociollingüística d’Asturies fecha por Francisco José Llera Ramo. Un 53 por cientu ve pocos avances granibles.

La entruga plantegada nesta ocasión yera ‘¿Los datos del avance de la III Encuesta Sociollingüística d’Asturies son pa ser optimistes?’, a lo qu’un 53 por cientu respondió ‘Non, veo pocos avances granibles’, por un 47 por cientu qu’optó por ‘Sí, resulten esperanzadores pal idioma’. El pasáu 28 de xunu’l direutor del Euskobarómetro, que s’encargó de los trés estudios fechos hasta la fecha, y el presidente de l’Academia de la Llingua Asturiana, Xosé Antón Fernández Riaño, avanzaron dellos datos de la mesma, como que’l 53 por cientu de la población sofita la oficialidá.

Dende esti momentu yá ye posible participar nun ‘Conceyu Abiertu’ nuevu. Nesta ocasión queremos conocer qué opinen los nuesos usuarios sobre la situación de la escena musical asturiana y el relevu xeneracional.