L’ALLA reclama “xusticia académica” pa “una persona del valir y el compromisu del profesor Llera Ramo”

La postura del Rectoráu de la Euskal Herriko Unibertsitatea de nun-y conceder la condición de profesor eméritu a Francisco José Llera Ramo cola que poder siguir, a los sos 70 años, cola docencia por nun consiguir el sofitu del so departamentu ta provocando numberoses reaiciones. Ente elles la de l’Academia de la Llingua Asturiana (ALLA), que reclama “xusticia académica” pal de Caravia.

Nun comunicáu, col que “nun quier otro que destacar el llabor y el prestixu de les sos contribuciones académiques ya investigadores”, la institución académica recuerda Llera Ramo “ye reconocíu como ún de los principales especialistes de la ciencia política n’España y tien amás una sonadía internacional incuestionable nesti ámbitu”. Asina, fai un repasu a la so trayeutoria, emponderando “el llabor y la rellación dende la Transición del profesor y miembru de númberu de l’ALLA col estudiu de les actitúes, espeutatives y demandes de los asturianos pa cola llingua asturiana”, citando les macroencuestes sociollingüístiques d’Asturies feches por él: la primera, ‘Los Asturianos y la Lengua Asturiana. Estudio Sociolingüístico para el Principado de Asturias’, “que fixo por encargu del Gobiernu del Principáu d’Asturies, nel añu 1991”, o les dos posteriores, ‘II Estudio sociolingüístico de Asturias 2002’ y ‘III Estudio sociolingüístico de Asturias. La recuperación del asturiano’, ellaboraes dende l’Euskobarómetro baxo la so direición y espublizaes pola ALLA.

“Darréu de lo anterior, l’Academia de la Llingua Asturiana quier pidir al Rectoráu de la Universidá del País Vascu que recapacite nel so determín y faiga xusticia académica a una persona del valir y compromisu del profesor Llera Ramo”, esplica nel comunciáu, axuntándose asina otres munches voces del mundu universitariu. Más de dos centenares de profesores universitarios roblaron una carta dirixida a Nekane Balluerka pa que rectifique la so negativa.

“Venganza política”, afirma Llera Ramo

La rectora xustifica que, pa la concesión de la condición de profesor eméritu, ye necesario’l sofitu de la Xunta de Facultá y del so departamentu. De la primera tienlu, pero non de los sos compañeros tres sumar 1 votu a favor, 2 en contra y 12 astenciones.

El propiu Llera Ramo, nuna entrevista al diariu dixital ‘El Independiente’, asegura qu’esti refugu “nun tien argumentación dalguna”. Na mesma l’asturianu fala de “venganza política”.