L’estudiu de seroprevalencia de la COVID-19 amuesa que namái’l 1,8 por cientu de los asturianos pasó la enfermedá

Asturies rexistra ún de los porcentaxes más baxos del Estáu de población afeutada pola COVID-19, lo que ye una bona noticia y al empar una situación de riesgu énte posibles biltos nuevos. Un 1,8 por cientu de los participantes asturianos nesti estudiu ambiciosu, del que se dio a conocer un informe preliminar, xeneró anticuerpos IgG frente al coronavirus SARS-Cov2, siendo la media estatal del 5.

L’Estudiu de Seroprevalencia, nel que participen más de 60.000 persones en tol Estáu dende’l 27 d’abril, de los que finalmente 1.545 son asturianos (713 homes y 832 muyeres), fíxose pa conocer la evolución real de la enfermedá. L’informe preliminar, presentáu ayeri, realizóse por provincies, ensin dar los datos individuales de les isles, que se van conocer más alantre.

Les cifres provisionales d'esta primer ronda reflexen qu’un 1,8 por cientu de los asturianos xeneraron anticuerpos, polo que pasaron la COVID-19. Ye una de les cifres más baxes del Estáu, ameyoraes namái por Ceuta (1,1 por cientu), Murcia y Las Palmas (1,4), Huelva (1,5), Tarragona (1,6) y Cádiz (1,7), y la mesma qu’A Coruña y Almería.

Nel llau contrariu tán Soria (14,2 por cientu), Cuenca (13,5) y Segovia (12,6). Los primeros focos de la pandemia dan cifres menores –Madrid (11,3), Araba (7,2) y La Rioja (3,3)–, al igual que la otra zona más afeutada, Barcelona (7,1).

Otra manera, les provinces vecines d’Asturies dan nesti estudiu preliminar un 7 por cientu, nel casu de Lleón; 3,2 por cientu, nel de Cantabria; y 2,3 por cientu, nel de Lugo. La tasa de participación ente les personas coles que se pudo contautar pa la ellaboración del estudiu algamó’l 74,7 por cientu y la previsión ye tar nuna cifra d’ente 60.000 y 90.000 participantes cuando fine’l mesmu, dientro d’unes seis selmanes.

Inmunidá de rebañu: 60 por cientu

L’estudiu confirma que tanto Asturies como’l restu del Estáu ta mui lloñe de la imnunidá de rebañu, que los espertos asitien nel 60 por cientu. Nesta situación considérase qu’hai un númberu suficiente de persones inmunes que permiten controlar la pandemia.

“Lo qu’amuesen estos datos ye que la ‘inmunidá del rebañu’, como alternativa al confinamientu, ye un llocura absoluta. Cuantes más personas contaxaes, más muertes. Polo tanto a falta de vacuna, caún yelo: cada contaxu que s’evita ye una potencial vida que se salva”, afirmó esta mañana’l presidente Adrián Barbón, que cifra en mil los muertos que tendría Asturies de tener un 5 por cientu d’infestaos.