L'estudiu de seroprevalencia rebaxa al 1,6 por cientu la cantidá d'asturianos que pasó la COVID-19

Namái Ceuta, Huelva y Illes Balears presenten una menor incidencia de la COVID-19 qu’Asturies según los datos del segundu informe del Estudiu de Seroprevalencia entamáu pol Ministeriu de Sanidá. El mesmu reflexa que namái un 1,6 por cientu de los asturianos pasaron la enfermedá, cuando la media estatal ye del 5,21.

L’avance del primer informe, presentáu’l 13 de mayu, asitiaba nun 1,8 por cientu la prevalencia estimada d’anticuerpos IgG frente a SARS-Cov2 n’Asturies, que finalmente quedó afitáu nun 1,9 por cientu. Agora l’estudiu coordináu pol Instituto de Salud Carlos III (ISCIII), cola participación de 162 persones más pa poner el total en 1.711, rebáxalu a 1,6 por cientu.

Esti porcentaxe ye’l mesmu que presenta Tarragona y Murcia, y namái rexistren meyores datos Ceuta (0,5 por cientu), Huelva (1,2) y Illes Balears (1,5). La incidencia tan baxa de la COVID-19 ye una bona noticia al significiar que menos xente pasó la enfermedá y pudieron evitase más muertes, anque tamién se trata d’un arma de doble filu al tar la población más espuesta de producise biltos nuevos del coronavirus.

Les provincies con más afeutaos son Soria (14,7 por cientu), Cuenca (14,2) y Segovia (12,6), mentres que la media estatal, con 63564 participantes nel estudiu, ye del 5,21 por cientu. Esti estudiu tien l’oxetivu de conocer la prevalencia d’infeición por SARS-Cov2 al traviés de la determinación d’anticuerpos frente al virus nel Estáu y evaluar la so evolución temporal, correspondiendo estos datos a una segunda ronda de tests rápidos a los voluntarios escoyíos pa la muestra fecha del 18 de mayu al 1 de xunu, y tando pendiente una tercera fola de pruebes.