Fernández Muñiz ve mui posible un aumentu de positivos nel procesu de desescalada

El conseyeru de Sanidá, Pablo Ignacio Fernández Muñiz, dio una videoconferencia informativa esti vienres pal grupu de trabayu de la Xunta Xeneral pal siguimientu y evaluación del coronavirus n’Asturies. Na mesma reconoció que ye mui posible que nel complexu procesu de desescalada haya un aumentu de contaxos.

Acompañáu pol equipu de la conseyería, detalló a Marcelino Marcos, presidente de la Xunta Xeneral y del grupu de trabayu, y a los representantes de los partíos les actuaciones sanitaries propuestes p’amenorgar los efeutos de la pandemia nel país amás de detallar la evolución de la situación sanitaria. Calificó d’etapa “de gran complexidá” la desescalada y apuntó que “ye mui probable” una medra de los casos positivos a lo llargo del procesu anque se faigan bien les coses, polo que llamó a “nun relaxase”.

Poco depués, Rafael Cofiño, direutor xeneral de Salú Pública; Ignacio Donate, direutor del proyeutu p’Asturies del estudiu estatal de seroepidemioloxía de la infeición por SARS-CoV-2; y Óscar Suárez, coordinador de programes del Servicio de Salú del Principáu d’Asturies (SESPA), informaron sobre l’estudiu de seroprevalencia de la COVID-19 nel país, que va entamar el llunes. De calter estatal, 2.400 asturianos van participar nel mesmu pa conocer el porcentaxe de población con inmunidá frente al coronavirus.