Asturies cuenta con pasar a la fase 2 del procesu de desescalada’l llunes 25

“Si too va bien pasarémos a fase 2 non el próximu llunes, sinón el siguiente”, treslladó’l conseyeru de Salú, Pablo Ignacio Fernández Muñiz, a los grupos parllamentarios na so comparecencia telemática nel grupu de trabayu de la Xunta sobre la COVID-19. D’esta forma Asturies siguiría’l calendariu de la desescalada.

La fase 2 de la desescalada traerá menos restricciones a la población, cola posibilidá de prauticar la pesca deporiva, l’aperturta de cines y teatros a un 30 por cientu del aforu o que los chigres puedan trabayar l’interior de los llocales a los veceros pa ocupar les meses a un 50 por cientu, ente otres aiciones. Asturies va solicitar el pasu a la mesma la selmana próxima, como confirmó Fernández Muñiz nuna respuesta a una entruga de la vocera de Ciudadanos Laura Pérez Macho sobre l'hospital de campaña del Recintu Ferial Luis Adaro –va caltenese, al igual qu'otros dispositivos especiales esistentes anguaño, pa cubrir un posible biltu o p'aisllar a pacientes–, cola previsión de dar un pasu más na desescalada de siguir les bones cifres de la pandemia de COVID-19 nel país.

El conseyeru de Salud llamó, sicasí, a la prudencia énte la baxa inmunidá de la población asturiana, como amosaron los datos preliminares del estudiu de seroprevalencia, que dan un 1,8 por cientu de ciudadanos con anticuerpos IgG frente al coronavirus SARS-Cov2. Tamián afaló a “caltener el virus a raya” cola adopción, nos meses próximos, de midíes de proteición y prevención, esto ye, guardar la distancia de seguridá de dos metros ente personas y usar mázcaros y mampares en llugares d’atención al públicu.

“Si lo facemos como hasta agora siguiremos teniendo menos persones y residencies afeutaes y menos muertes que na mayoría de los territorios d’España”, añadió Fenrández Muñiz, qu’añadió que “nun ye momentu nin d’euforia nin de pesimismu, sinón de sentíu común, rigor y prudencia”.