Les Xornaes Elías García recuerden al músicu y ornitólogu con actividaes diverses en Villaviciosa
- Les Xornaes Elías García d'homenaxe al músicu y ornitólogu van celebrase del 16 al 18 de setiembre
- “Elías yera una figura tan grande que se nos escapa de les manes; tanta xente quier tar que nun podemos tar toos”, asegura Ambás
- “Elías tuvo años nos que de los 365 díes salió 340 al campu” pa observar páxaros, rellata Álvarez
- “Na esposición va poder vese cómo Elías llegó a la ornitoloxía por casualidá”, adelanta García Doral
- Ésitu de públicu y participación nes primeres Xornaes Elías García de Villaviciosa
|
16 Setiembre, 2022 por Redacción
- Inicie sesión o rexístrese pa espublizar comentarios
Una esposición, un congresu ornitolóxicu, conciertos y una plantación d'árboles autóctonos van tener llugar esta fin de selmana.
Esta tarde arrancaron les Xornaes Elías García d'homenaxe al músicu y ornitólogu coincidiendo col tercer aniversariu de la so perda. Fíxolo coles VII Xornaes Ornitolóxiques Cantábriques que tán desendolcándose nel Atenéu Obreru de Villaviciosa, que se van allargar mañana y van concluyir el domingu con una salida per La Ría.
Dende'l vienres pasáu ye posible visitar nel mesmu Atenéu la esposición que busca averar la figura de García al gran públicu, mostrando les sos aportaciones tanto al campu de la música como de la ornitoloxía per aciu d'un abanicu ampliu d'oxetos personales, espublizaciones, cuadernos de campo, instrumentos musicales, la so discografía completa, etc. Los dos díes próximes va tar abierta de 11 a 13 y de 17.30 a 19.30 hores.
Tamién tán previstos un taller de dibuxu y iniciación al cuadernu de campu ornitolóxicu, a cargu de Gonzalo Gil, que va tener llugar el sábadu a les 12 hores empobináu pa neñes y neños mayores de 10 años, anque ensin llende d’edá, y una plantación d'árboles autóctonos el domigu pela mañana nuna finca d’Espina de la contorna de La Ría, na parroquia de Seloriu.
La parte musical
Como nun podía ser d'otra forma, la música va tener un pesu importante nesti homenaxe. Mañana na Plaza’l Güevu van actuar la Banda de Gaites Villaviciosa, Mariluz Cristóbal Caunedo, Xuacu Amieva, y Ambás y Ramsés a partir de les 20.30 hores.
El domingu va ser el turnu de Llan de Cubel y Felpeyu, que van pesllar un conciertu nel Teatru Riera que va axuntar tamién, dende les 19.30 hores, a La Garrapiella, Loína y Herbamora. L'asistencia ye de baldre, pero ye necesario acutar entrada nesti enllaz.
Na semeya, ún de les charres celebraes esta tarde dientro de les VII Xornaes Ornitolóxiques Cantábriques.
Efrén d'Andrés
