“Na esposición va poder vese cómo Elías llegó a la ornitoloxía por casualidá”, adelanta García Doral

La prima del tamién músicu apunta que “tenemos la intención de qu’esta muestra acerque un poco más la ornitoloxía” a la xente.

“Si Elías taría un poco enfadáu con tol tema musical y el congresu, cola esposición... Sería lo que más aborrecería del tol montaxe”, señaló Beatriz García Doral en consonancia colo dicho previamente na presentación de les Xornaes Elías García por Xosé Antón Fernández ‘Ambás’ y David Álvarez, que s’encargaron de detallar eses dos estayes, de manera respeutiva. “Pero pa min yera mui necesaria, por esa humildá que tenía. A pesar de la maestría, de tol talentu que mostró, siempre taba en segunda filera”, añadió la familiar.

Cola esposición “van salir anécdotes a baruyu”, siguió, y por exemplu “nella va pode vese cómo llegó a la ornitoloxía por casualidá. Nun desveló más, vais tener que dir”. “Tenemos la intención de qu’esta esposición acerque un poco más a la ornitoloxía”, finó García Doral.

La esposición d'homenaxe a García va inaugurase esti mesmu vienres, una selmana enantes de les xornaes, y va tener como sede l’Atenéu Obreru de Villaviciosa. L’horariu de visita ye de 17.30 a 19.30 hores, que se va ampliar el 17 y 18, día últimu de la muestra, pela mañana de 11 a 13.

Na semeya, José Miguel Beneyto, miembru de la Xunta Direutiva del Atenéu Obreru de Villaviciosa; l'alcalde Alejandro Vega; Ambás; Álvarez; y García Doral.