“Elías yera una figura tan grande que se nos escapa de les manes; tanta xente quier tar que nun podemos tar toos”, asegura Ambás

Familiares y collacios d’Elías García, músicu y ornitólogu qu’Asturies perdiera nel 2019, entamen del 16 al 18 d’esti mes en Villaviciosa como homenaxe les Xornaes Elías García. Ambás, compañeru en Tuenda, apuntó na presentación de les actividaes que “sé yo que tará contentu, si ye que nos pudiere ver per un furaquín, pero tará tamién hasta dalgo enfadáu de que se preparare tantu telar na so alcordanza”.

Al Atenéu Obreru de Villaviciosa, espaciu cedíu pol Conceyu de Villaviciosa p’acoyer gran parte de les actividaes, acudió’l cantante y recopilador de la tradición oral del país, pa esplicar la estaya musical de les xornaes; xunto con David Álvarez, qu’espuso lo que tenía que ver col congresu ornitolóxicu y la plantación d’árboles autóctonos; y cola prima d’Elías, Beatriz García Doral, que se centró na esposición que va abrir les sos puertes el día 9. En representación del Ayuntamientu tuvo l’acalde, Alejandro Vega, qu’emplegó l’asturianu na so intervención, y na del Atenéu Obreru’l miembru de la Xunta Direutiva, José Miguel Beneyto, cola conceyala de Cultura, Rocío Vega, nel públicu.

El primer edil agradeció a tolos “que puxaron pa qu’esto saliere alantre”, tamién por “pensar en Vilaviciosa” pa ser sede de los eventos. “Tamos falando d’Elías García, por tanto de folk, de música tradicional asturiana, de la meyor; y d’ornitoloxía, qu’en Villaviciosa son pallabres mayores. Sobra dicir que tamos nel llugar adecuáu depués d’estos dos años qu’impidieron esa alcordanza d’Elías. Creo que ye bon momentu p’alcordase siempre, pero facía falta esti reconocimientu y tamos mui arguyosos en Villaviciosa de que pueda facesese equí”, declaró.

Tamién apuntó que “pa Villaviciosa ye un arguyu que se puedan retomar equí” les Xornaes Ornitolóxiques Cantábriques depués de la última edición celebrada nel 2014 n’Oseya de Sayambre. Deseó “que pueda cobrar vida equí en Villaviciosa, y, na midida de les nuese posibilidaes, collaborar en próximes ediciones con elles porque tenemos munchu interés en poder potenciar la ornitoloxía, y si ye lligáu a la música folk y tradicional d’Asturies, muncho meyor”.

Conciertos el sábadu y el domingu

La música va tener, como nun podía ser d’otra manera, un papel protagonista nes Xornaes Elías García. El sábadu, “si’l tiempu lo permite, na plaza’l Güevu” a les 20.30 hores, van entamase “conciertos más acústicos, más tradicionales” con “ésti que vos fala –Xosé Antón Fernández 'Ambás'–, de pandereta” xunto con Ramsés Ilesies; con Xuacu Amieva “cola formación que tien pero basáu en repertoriu baillable de gaita”; con Mariluz Cristóbal; y cola Banda Gaites Villaviciosa-El Gaitero”.

“Y de domingu nel teatru” Riera, a les 19 hores, “formaciones tan importantes como Llan de Cubel y Felpeyu, que son los grupos, xunto con Tuenda, más importantes na carrera musical d’Elías, pero tamién la bandina La Garrapiella, el grupu Loína y Herbamora. Ta’l panorama musical asturianu representáu perriba y perbaxo”, rescampló.

“Elías yera una figura tan grande que se nos escapa de les manes y entamar estes xornaes púsonos llocos de tantes actividaes que se nos veníen a la cabeza, porque él taba rellacionáu con tantes coses y ye tan queríu por tanta xente de tantos ámbitos... Too paecíanos poco, había veces qu’había que sentase y dicir ‘parái, son les primeres xornaes, nun hai que ser tan ambiciosos’. La figura d’Elías ye tan importante que tanta xente quier tar que nun podemos tar toos”, aseguró.

A lo último afirmó que “Elías ye la banda sonora d’Asturies. Son pallabres mayores. Yelo porque detrás d’él ta’l trabayu de los gupos más importantes del folk d’Asturies; Herbamores tamién. Tola reellaboración que ta faciendo la música tradicional d’esta tierra tien el toque Elías. Esa incorporación del bouzouki yá nos 80 fixo que cambiara la visión de cómo se trabayaba la música tracional asturiana”.

Tamién tuvo pallabres pa Villaviciosa, conceyu que s’escoyó “porque tien unes característiques úniques: sois afortunaos de tener una ría que pa los ornitólogos ye un santuariu, tamién pa Elías, que quería muncho a esti conceyu, y sois un conceyu que siempre apostó y sigue apostando pola música tradicional d’esta tierra de manera impresionante”. “Abristeisnos les puertes d’estes instalaciones que son envidiables”, en referencia al Atenéu, “y tamos mui contentos, como contentu taría Elías”.

Beneyto, pela so parte, respondió con un “bienveníos”. “Tamos encantaos, contáis cola nuesa collaboración y namái deseavos que salga tou fenomenal. Ánimo y a por ello”, añadió’l miembru de la Xunta Direutiva.

Na semeya, Beneyto, García Rondal, Alejandro Vega, Ambás, Álvarez y Rocío Vega.