Ésitu de públicu y participación nes primeres Xornaes Elías García de Villaviciosa

|
Plantación árbol autóctonu Xornaes Elías García

Celebráronse esta fin de selmana nel conceyu como homenaxe al músicu y ornitólogu nel tercer aniversariu de la so perda.

Les Xornaes Elías García, celebraes ente'l vienres y ayeri, foron un ésitu de públicu y participación. Todos los eventos entamaos estos trés díes en Villaviciosa tuvieron una gran respuesta.

Les VII Xornaes Ornitolóxiques Cantábriques sirvieron na tarde del vienres d'arranque a una iniciativa d'homenaxe que, en realidá, abrió'l día 9 cola inauguración de la esposición del Atenéu Obreru de Villaviciosa que presentaba a los visitantes la figura de García. Munchos ornitólogos acudieron a esta cita que nun s'entamaba dende'l 2014.

Tuvieron tamién una importante participación el taller de dibuxu y iniciación al cuadernu de campu ornitolóxicu que punxo na mañana del sábadu Gonzalo Gil nel propiu Atenéu y la plantación d'árboles autóctonos ayeri pela mañana nuna finca d’Espina de la contorna de La Ría, na parroquia de Seloriu. Los conciertos, protagonizaos el sábadu na plaza'l Güevu pola Banda de Gaites Villaviciosa, Mariluz Cristóbal Caunedo, Xuacu Amieva, y Ambás y Ramsés, y ayeri nel Teatru Riera por La Garrapiella, Loína y Herbamora y los dos grupos de García, xunto col agora inactivu Tuenda, Llan de Cubel y Felpeyu, dexaron un bon sabor de boca tanto a músicos y asistentes.

Intención de continuidá

Los promotores de les Xornaes Elías García, familiares, compañeros y collacios del artista, amuesen la so satisfaición por cómo se desendolcó esta iniciativa, a la que tienen previsto da-y continuidá, y pola alta participación. En feches próximes, previsiblemente la selmana qu'entra, van aconceyar pa facer balance d'esta primer edición y valorar les posibilidaes pa siguir alantre nel futuru con esti homenaxe.

Na semeya, un momentu de l'actividá de plantación d'árboles autóctonos xunto a La Ría.

 

Contador Estadistiques