José Manuel Tejedor, Bada y Algaire representen a Asturies nel LII Festival Interceltique de Lorient

|
Festival Interceltique de Lorient nel 2022

Asturies va acudir un añu más al Festival Interceltique de Lorient, que nesta edición celebra l’Année de l’Irlande, con una representación de primer nivel. José Manuel Tejedor, Rubén Bada y Algaire van conformar la delegación asturiana, que se completa cola Banda de Gaites de Castrillón y el Grupu de Baille Tradicional Fitoria.

Depués d’un 2022 emocionante nel qu’Asturies foi’l país convidáu, el festival bretón dio a conocer ayeri la programación completa del eventu que va desenvolvese del 4 al 13 d’agostu. A l’asistencia yá confirmada de José Manuel Tejedor sumóse al cartelu Rubén Bada, que va participar nel segundu Celtic Odyssée xunto col gaiteru y más artistes d’otres naciones celtes el vienres 11 a les 21.30 hores nel Espace Jean-Pierre Pichard, y Algaire, trunfadores l’añu pasáu n’An Oriant coles sos actuaciones na carpa d’Asturies y el Trophée Loïc Raison de talentos nuevos.

L’avilesín va tocar el miércoles 9 a les 21.30 hores na Quai de la Bretagne dientro del ciclu La Bretagne Invite xunto colos llocales Spontus y Le Bour/Bodros. Mentes, los mierenses van tar el martes 8 en Le Kleub dende les 21.30 hores nuna sesión que van compartir colos escoceses Kinnaris Quintet y los bretones Djs Celtes.

La representación asturiana nel Grande Parade des Nations Celtes (domingu 6, a les 10 hores peles cais d’An Oriant), n’Horizons Celtiques (sábadu 5, domingu 6, martes 8, miércoles 9 y xueves 10 a les 21.30 nel Stade du Moustoir) y na animación de cai va correr a cargu de la Banda de Gaites de Castrillón y el Grupu de Baille Tradicional Fitoria. L’agrupación de Piedrasblancas tamién va participar el martes 8 a les 14.30 nel Espace Jean-Pierre Pichard na estaya Musique et Danses des Pays Celtes xunto colos galeses Only Boys Aloud y los córnicos Kekezza, mentes que los uvieínos van facelo’l sábadu 5 en compañía de los australianos The City of Melbourne Highland Pipe Band, los gallegos Grupo de Baile A Ponte Vella y los escoceses Interceltic Scottish Pipe Band, amás de nunos talleres de baille asturianu programaos pal vienres 11 a les 16 hores na Salle Carnot.

Amás, Daniel Meré va poner col gallegu Ismael García la tradicional clase maestra de gaita del sábadu, prevista pa les 10 hores en Le Palais. Esi mesmu día va tener llugar el XXXVI Trophée Mac Crimmon de Gaita nel qu’Asturies va tar representáu por Nel Cortizo, Diego Lobo, Jaime Álvarez y Paula Gutiérrez.

No que respeuta al restu de la programación del Festival Interceltique rescamplen les actuaciones de los irlandeses Clannad y Altan, la estauxunidense Suzanne Vega, los corsos I Muvrini o del cantautor francés Hubert-Félix Thiéfaine. Yá tán a la venta les entraes pa tolos conciertos.

Contador Estadistiques