La falta de restorán nel pabellón d'Asturies, gran ausencia nel Festival Interceltique de Lorient

Nengún hosteleru presentóse a les cinco llicitaciones sacaes pol Gobiernu estos meses.

Los miles de visitantes qu'estos díes averáronse a la Place des Pays Celtes, onde taba asitiáu'l pabellón d'Asturies nel LI Festival Interceltique de Lorient, llevábense la sorpresa de la falta d'un restorán onde saborguiar la gastronomía asturiana. Namái un puestu con miel y otros productos asturianos, y otru de venta de sidra y de cerveza, acompañaben a la carpa onde teníen llugar los conciertos nocherniegos de grupos procedentes d'Asturies.

Una ausencia qu'arrequexaba l'ambiente nel llugar a les hores a partir del atapecer, cuando se programaben les actuaciones, o cuando había animación de cai por parte de La Garrapiella y el Cuarteto Monteavaro, Muñalén & Rodrigues, dalgo que contrastaba col ambiente del pabellón de Galicia, asitiáu nel puertu. Nél gracies a la iniciativa d'una empresa privada, Pulpalia, ufríase gastronomía gallega a la muncha xente interesao en prebar los sos productos.

Entrugada por esta situación por Asturies.com n'An Oriant, la conseyera de Cultura, Política Llingüística y Turismu, Berta Piñán, esplicó que "nosotros sacamos cinco llicitaciones con unes condiciones mui ventayoses pa quién garrara", na so consideración, a les que nun se presentó nengún hosteleru. "Hai que pensar que n'Asturies ta siendo un agostu na que la hostelería requier munchu trabayu, muncha dedicación, y nun hebo finalmente un macrorestaurante que lu garrara", añadió pa depués apuntar que "tenemos sidra, cerveza asturiana, productos asturianos que se pueden consumir equí, de fechu tán consumiéndose, y ye un escaparate de los productos d'Asturies, de la Denominación d'Orixe".

"Ye una circunstancia puramente hostelera que nun se dio", siguió, "y habrá que deprender la lleición de que la hostelería asturiana necesita quiciabes enterase bien a fondu de lo que significa venir a Lorient, una apuesta comercial interesante pa cualquiera que venga, porque per equí pasen 800.000 persones a lo llargo de 10 díes".

Na semeya, tienda y chigre d'Asturies nesta edición del Interceltique.