L’Antroxu modernu trai cinco díes de mazcaritos y celebraciones

Esta nueche ye Comadres, festexu que da entamu a les celebraciones del Antroxu modernu. Per delantre queden cinco díes de mazcaritos y muncha folixa onde la gastronomía tien un pesu importante, colos productos procedente del gochu y los postres como los frixuelos, les picatostes y les casadielles como protagonistes.

El bon tiempu va acompañar esti añu a una folixa mui esperada poles asturianes y asturianos, que preparen los sos traxes p’amarutase en familia o con collacios. Xixón y Avilés son los dos llugares onde esta celebración tien más puxu, con una programación amplia preparada pa estos díes.

Esta nueche arranquen los festexos con Les Comadres, festividá protagonizada por muyeres con orixe que pudiera tar fuera del Antroxu tradicional. Xixón y La Pola Siero son les villes que nos años últimos caltienen con más fuercia esta tradición que mantuvieron per munchos años les cigarreres de la fábrica de tabacos de Cimavilla.

Éstes, xunto a les sos fíes y collacies, xubíen hasta La Providencia a pasar la tarde en compañía femenina y disfutar de viandes y postres típicos del Antroxu, como naranxes, 'teresites', frixuelos o casadielles. Mentes, en La Pola les muyeres diben al conocíu como Prau Malatu o Prau Picón a merendar bollos preñaos, sidra y casadielles.

Col pasu del tiempu la folixa treslladóse de la tarde a la nueche y munchos restoranes ofrecen menús especiales pa esta xornada. En La Pola, amás hai verbena dende les 23 hores col Grupo Beatriz y DJ Pika.

'Comadre de Oro' y Felpeyu

Ye de destacar tamién el llabor de la Tertulia Feminista Les Comadres pa potenciar esta fecha festiva, dando-y un toque reivindicativu. Esti añu torna la celebración presencial pa la entrega de los sos premios, el ‘Comadre de Oro’ y el Felpeyu –ésti últimu a persones o entidaes que desprecien a la muyer–, na sala Albéniz dende les 20 hores con cena y baille.

El ‘Comadre de Oro’ ye pa la cómica Patricia Sornosa “pol so estilu combativu reivindicando l’Axenda Feminista al traviés del humor y l’espectáculu, poles sos inxenioses respuestes a los ataques machistes nes redes sociales y pol so rap estrenáu en Xixón na Conferencia de Comadres ‘¿Qué coño es ser mujer?’”. Amás, la cantante Anabel Santiago va recibir un ‘Comadre de Oro especial’ “polos sos méritos profesionales y el so activismu feminista cola Plataforma de Mujeres Artistas en Palestina y el Sáḥara”.

Nel llau de los antipremios, el títulu de Felpeyu va pal madrilanu Colegio Mayor Elías Ahuja “por consentir que dende va años se venga produciendo l’acosu a les moces del colexu mayor vecín”. Esti añu tamién entrégase’l Babayu, que la tertulia dedica al arzobismu Jesús Sanz Montes “poles sos reiteraes alocuciones machistes aprovechando’l Día d’Asturies” en Cuadonga “pa ofender a les asturianes y atacar, nesta ocasión última, l’albuertu y la eutanasia”.

Lloñe de la tradición

L’Antroxu entamaba nel pasáu col solsticiu d’iviernu, con mazcaraes per tol país, y agora, tres la recuperación acontecida cola fin del Franquismu, resúmese a les xornaes previes al Miércoles de Ceniza, primer día de la Cuaresma. Una vuelta, sicasí, alloñada de la tradición, imitando a los carnavales más mediáticos como’l de Rio de Janeiro, Tenerife, Las Palmas o Cádiz.

Los antroxos de Xixón y Avilés son los más importantes en cuantes a programa institucional y participación. Los xueves ye habitual ver a los neños amazcaraos nos colexos y los vienres en Xixón les charangues calecen motores pal concursu d’estes formaciones del sábadu y del domingu, que yá va pola so trentena quinta edición con una participación alta y fileres na nueche pa mercar entrada pal Teatru Xovellanos.

El sábadu los focos van p’Avilés, onde se celebra’l Descensu Internacional y Fluvial de Galiana, na so trentena quinta edición, a partir de les 19.30 hores cola participación de 25 artiluxos. Una gran cantidá de chigres de la ciudá antróxense pa estos díes pa participar nun concursu entamáu polos comerciantes de la ciudá, esti añu baxo la temática de los años 90, y la xente sal a la cai coles sos mázcares pa pasar una xornada de folixa.

El domingu ye’l Domingu’l Gordu, que na tradición yera celebráu polos homes y que nel Antroxu modernu resúmese a les actividaes programaes polos conceyos. Mentes, la xornada siguiente ye’l día grande, el Llunes d’Antroxu, cola celebración d’un desfile peles cais de les villes –ye especialmente espectacular el de Xixón, con salida a les 19 hores de la plaza de toros– y l’allargue de la folixa hasta bien entrada la madrugada. Ésti ye’l día más desenfadáu del añu y nel que la xente tien más vezu d’antroxase, sobre manera la más mozo.

El xolgoriu del Antroxu termina’l Martes d’Antroxu col Entierru la Sardina –n'Avilés celébrase'l miércoles–, cuando un conxuntu de plañideres acompañen a la sardina, que representa a don Carnal, nun cortexu fúnebre tres la so muerte. Ye’l final del Antroxu y l’entamu de la Cuaresma col Miércoles de Ceniza; de la vixilia y de la preparación pa la Selmana Santa. Por ello, ye nesta xornada cuando se disfrutaba de la comida y la bébora n’escesu, n’especial la carne.

Güei, d’esta tradición, queda’l menú d’Antroxu tan solicitáu nos restoranes asturianos y na que’l gochu, al ser época de matanza, ye protagonista. Asina, el que venden los establecimientos xixoneses ta compuestu por un pote asturianu, picadiellu y los postres típicos d’esta época, como los frixuelos, les casadielles y les picatostes.

Celebración en Cuaresma

En delles ciudaes d’Asturies les festividaes d’Antroxu celébrense fuera de les feches tradicionales, en plena Cuaresma, como asocede en Mieres del Camín, Uviéu o La Pola Ḷḷena. Nesti casu respuende a intereses de la hostelería d’eses villes más qu’a otra cosa, dexando pa prau una tradición perguapa yá de por sí alloñada del so espíritu ainicial por mor de los tiempos modernos y del dañu que fixo la dictadura de Franco a les tradiciones populares.

Les persones que quieran conocer de primer mano l’orixe del Antroxu asturianu y les sos peculiaridaes pueden disfrutar de la serie realizada por Xurde Morán na seición ‘Ye tiempu de…’ d’Asturies.com na que nun falta un detalle d’esta folixa, asina como otru de Pilar Sánchez Vicente entituláu 'L'Antroxu'. Los más mozos tamién pueden averase a esta celebración col reportaxe de la nuesa estaya infantil 'A la Gueta los Suaños' sobre la tradición o’l más reciente entituláu 'L'Antroxu y la lluna' qu’esplica por qué cai nuna fecha diferente cada añu.

Na semeya, escolines y escolinos del avilesín CP Marcelo Gago ayeri con mázcares d'El Gruñu, mazcaritu del Antroxu tradicional avilesín que'l Coleutivu Abillés Antroxu Tradicional recuperó esti añu.