La XXXIX Selmana de les Lletres Asturianes va tar dedicada a la lliteratura infantil y xuvenil

|
Cartelu XXXIX Selmana de les Lletres Asturianes

El vienres va echar a andar en Llorgozana, con un actu poéticu al alborecer, la XXXIX Selmana de les Lletres Asturianes, dedicada esti añu a la lliteratura infantil y xuvenil. Hasta’l 8 de mayu van desendolcase actividaes al rodiu l’idioma en nueve conceyos, siendo la xornada central el vienres 4, Día de les Lletres Asturianes.

Talleres, esposiciones, homenaxes, presentaciones de llibros, llectures públiques, certámenes lliterarios, alcuentros escolares, entregues de premios, visites guiaes, conciertos y representaciones teatrales componen les más de venti actividaes programaes pa estos díes, nos que van tener un protagonismu especial la lliteratura infantil y xuvenil. L’actu inaugural va celebrase’l vienres a primer hora, l’Alba de les Lletres Asturianes, que va tener como sede la escuela de Llorgozana a les 7 hores, iniciativa novedosa que ta tamién encuadrada nel Programa Cultural Antón de Marirreguera que vien entamando dende xineru’l Conceyu de Carreño.

Silvia Suárez García y Ismael González Arias van encargase de conducilu, y nél van intervenir Candela Murias Gutiérrez, alumna del CEIP Poeta Antón, y Pablo X. Suárez, ganador del XXIII Premiu Xuan María Acebal de poesía n’asturianu cola obra ‘Little Babilonia’. Darréu va haber un programa d’animación pa escolines y escolinos de les escueles rurales, mentes que n’Antigua Fábrica d’Ortiz, en Candás, va comenzar a les 10 hores la I Feria del Llibru n'Asturianu, que va allargase hasta’l domingu.

Esa mesma mañana, en Santolaya al meudía, va celebrase un homenaxe a la escritora cabraniega María Xosefa Canellada y Kamante Teatro va representar una adaptación teatral de la so obra ‘Montesín’, mentes que nel Centru de Cultura Antiguu Institutu de Xixón va inaugurase la esposición ‘Falar ensin parar’, con testos de Carlos González Espina e ilustraciones de Marina Lobo, que va tar abierta hasta'l domingu 20 de mayu.

Les visites guiaes aporten a Avilés y Ribeseya

El llunes van comenzar les visites guiaes n’asturianu a ciudaes asturianes depués de la bona esperiencia del añu pasáu en Xixón y Uviéu. Avilés va ser la primera, mentes que Ribeseya va debutar nesta iniciativa’l sábadu (16.30 hores) y domingu (11 hores).

El paséu per Uviéu ta previstu pa’l martes, mentes que’l de Xixón ta programáu pal miércoles, dambes, al igual que n’Avilés, a partir de les 19.30 hores. Pa participar nestes actividaes, de baldre, ye necesario acutar plaza per teléfonu o corréu electrónicu a les señes que pue consultar nel programa de la XXXIX Selmana de les Lletres Asturianes axuntu al final d’esta noticia.

El miércoles 2 la Xunta Xeneral va acoyer la tradicional llectura pública institucional de testos n'asturianu y gallego-asturiano. Esa mesma tarde, a les 18 hores, va celebrase en Les Vegues l’atopada poética ‘Versovera’, y a les 19 hores nel Auditoriu de Siero l’espectáculu musical ‘Xentiquina: una mirada a la lliteratura infantil’, mentes qu’a les 19.30 hores, en collaboración cola Fundación Aula de les Metáfores de Grau, van entregase nesta población los diplomes del V Premiu de Poesía que se convoca pal alumnáu d'esi conceyu, amás d'acoyer un actu poéticu musical cola presencia de Pablo X. Suárez.

VI Feria del Llibru y Discu n’Asturianu

La VI Feria del Llibru y Discu n’asturianu, entamada en collaboración col Conceyu d'Avilés y l'Asociación de Llibreríes del Principáu d'Asturies, inaugúrase'l xueves 3 cola presentación de les ediciones conmemoratives ‘Cúntame un cuentu’ y ‘Cúntame un conto’, dos obres, n'asturianu y gallego-asturiano, de manera respeutiva, con rellatos infantiles y xuveniles de 18 autores y ilustradores de toda Asturies. Estos dos llibros van regalase'l vienres 4 de mayu, Día del Llibru Asturianu, en 53 puntos de distribución d'Asturies al mercar llibros y discos en cualquier de les dos llingües, recibiendo tamién un 10 por cientu de descuentu na merca.

Los puestos van tar instalaos nuna carpa llevantada na plaza Domingo Álvarez Acebal y la feria va tar abierta hasta'l domingu 6. Presentaciones de llibros, sesiones de cuentacuentos, conciertos y alcuentros lliterarios van desendolcase nel llugar mientres estos cuatro díes.

Mentes, a les 18 hores, el Teatru de la Llaboral va acoyer la gala d’entrega de premios del V Certame de Teatru Escolar. Nella van representase toles obres premiaes.

XXXIX Día de les Lletres Asturianes

L’IES Víctor García de la Concha de Villaviciosa va ser l'escenariu el vienres 4, Día de les Lletres Asturianes, del actu escolar institucional de celebración la Selmana de les Lletres cola entrega de los premios de los certámenes artísticu y lliterariu. Yá de nueche, a les 22 hores, nel Teatru El Llar, en Les Vegues, va representase la obra ‘Crisis y otres histories’, con testu d’Adolfo Camilio Díaz, que van poner escena los participantes nos Talleres de Teatru p’Adultos de Corvera.

Fuera de les actividaes programaes pola Conseyería d’Educación y Cultura, l’Academia de la Llingua Asturiana va celebrar l’actu académicu nel Teatru Campoamor, onde la institución va acoyer como académiques a la historiadora y profesora de la Universidá d’Uviéu na Facultá de Filosofía y Lletres, Margarita Fernández Mier, y a la tamién profesora de la institución universitaria na Facultá de Formación del Profesoráu y Educación, pedagoga y socióloga, Isabel Hevia. Una hora enantes, a les 19.30 hores, la Xunta pola Defensa de la Llingua Asturiana va tornar a salir a la cai, como ye vezu nesta xornada, pa reclamar la oficialidá del idioma.

Gallego-asturiano

La Selmana de les Lletres Asturianes tamién va mirar pal occidente cola celebración el sábadu 5, a les 19 hores nel Auditoriu As Quintas d'A Caridá l’Homenaxe ás Nosas Lletras, que nesta ocasión va consistir nuna representación de ‘As miserias de Llázaro de Tormes’, a cargu de Carlos Alba ‘Cellero’. Trátase d'una versión en gallego-asturiano de la obra ‘Llázaro de Tormes’, ganadora del I Premiu Nel Amaro de Teatru profesional n’asturianu, que va poder disfrutase tamién nel Teatru Vital Aza de La Pola Ḷḷena el domingu 6 a les 20 hores.

El llunes 7 y el martes 8 va allargase la Selmana con actividaes pensaes pal públicu escolar. Asina va representase los espectáculos ‘El viaxe de Dorothy’, de Fantastique Company, y ‘Quixote’, de Cellero, nel Teatru de Llaboral Ciudá de la Cultura, de manera respeutiva.

Otra manera, el llunes a les 19 hores, el Centru Sociocultural de Les Vegues va ser sede d’un recital poéticu baxo’l nome ‘Los testos de los músicos del país como piecines de teatru’. El programa d'actos de la XXXIX Selmana de les Lletres Asturianes va zarrase'l martes 8 na Sala Borrón d'Uviéu cola tercer edición de ‘Entaína a escribir’, concursu de microrrellatos improvisaos n'asturianu pa la mocedá que se convoca a les 19.30 hores en collaboración col Institutu Asturianu de la Muyer y Polítiques de Mocedá.

Contador Estadistiques