L’Alba de les Lletres y la Feria del Llibru n'Asturianu de Carreño marquen l’aniciu de la selmana dedicada a la nuesa lliteratura

Yá ta too preparao en Llorgozana p’acoyer l’actu col que da comienzu esti vienres a primer hora de la mañana la XXXIX Selmana de les Lletres Asturianes: l’Alba Poética de les Lletres Asturianes. Darréu van abrise en Candás les puertes de la primer Feria del Llibru n’Asturianu, onde va ponese’l ramu a les actividaes del Programa Cultural Antón de Marirreguera.

La parroquia natal del poeta ye’l llugar escoyíu esti añu pola Conseyería d’Educación y Cultura p’abrir la gran fiesta de la nuesa lliteratura aprovechando esta iniciativa del Conceyu de Carreño. Trátase d’una propuesta novedosa, como ye recibir l’alborecer con poesía.

Asina, a les 7 hores, na escuela de Llorgozana Candela Murias, alumna de sestu de Primaria del CEIP Poeta Antón de Marirreguera y vecina d’El Valle, va recitar arropada pola so maestra de Llingua Asturiana y Lliteratura, Mercés Solares, y la so tutora Pilar Barbáu un poema propiu entituláu ‘El mar qu’escribe foles’, col que quier rindir homenaxe al escritor llocal. La moza va tar acompañada tamién por Pablo X. Suárez, ganador del XXIII Premiu Xuan María Acebal de poesía n’asturianu cola obra ‘Little Babilonia’, que va lleer dalgunos versos.

L’actu va tar presentáu por Silvia Suárez García y Ismael González Arias, encargándose ella de poner tamién el toque musical cola interpretación de delles pieces como ‘L’Andolina’ o la ‘Xota Carreño’ acompañada d’una pandereta. Fernando Padilla, direutor xeneral de Planificación Llingüística y Normalización, y l’alcaldesa de Carreño, Amelia Fernández López, van a acudir a esta inauguración de la Selmana de les Lletres, incluyida tamién nel Programa Cultural Antón de Marirreguera, xunto a representantes de la corporación municipal y de la comunidá educativa.

Una vegada finada l’Alba de les Lletres, l’alumnáu del centru de Llorgozana, asina como’l de Quimarán-El Valle, van disfrutar na propia escuela de la parroquia d’actividaes p’animar a la llectura en llingua asturiana que va contar cola presencia d’un actor, Silvino Torre de Factótum Teatro, carauterizáu como Antón de Marirreguera. D’esta forma, al traviés de xuegos, va averar a la reciella la vida y obra del autor.

Otra manera, nesta primer xornada de la XXXIX Selmana de les Lletres Asturianes, que va allargase hasta’l 8 de mayu, va celebrase un homenaxe al meudía en Santolaya a la escritora cabraniega María Xosefa Canellada y Kamante Teatro va representar una adaptación teatral de la so obra ‘Montesín’, mentes que nel Centru de Cultura Antiguu Institutu de Xixón va inaugurase la esposición ‘Falar ensin parar’, con testos de Carlos González Espina e ilustraciones de Marina Lobo, que va tar abierta hasta'l domingu 20 de mayu.

Ocho llibreríes y editoriales

L’Antigua Fábrica d’Ortiz va acoyer dende mañana a les 10 hores la primer Feria del Llibru Asturianu. Un total d’ocho llibreríes y editoriales van participar nesti eventu que va acoyer actividaes al rodiu de la llingua asturiana mientres trés díes: mañana, de 10 a 14 y de 17 a 20.30 hores; el sábadu, de 11 a 14.30 y de 18 a 22.30 hores; y el domingu, de 11 a 14.30 hores.

Animación infantil, recitales de poesía, teatru, conciertos o  monólogos tán programaos mientres estes xornaes, que van llegar tamién al Muséu Antón, el Teatru Prendes o chigres de la zona. Ente elles destaca la intervención de Xuan Bello dientro del ciclu ‘Poétiques’ (18.30 hores, Muséu Antón); la representación de ‘Xuan Soldáu’ a cargu de Carlos Alba ‘Cellero’ (21 hores, Teatru Prendes); la presentación del llibru ‘Incorrectos’, del escritor llocal David Artime (sábadu 12 hores, feria); un recital de poesía colos autores mozos Diego Solís, Irma González-Quevedo, Aida Escudero y Inaciu Galán (sábadu 19.30 hores, feria); y un conciertu de cantautores asturianos, cola participación de Lafu & Rebeca Velasco, Rubén Bada y Leticia González (sábadu 21.30 hores, feria).

Na semeya, Candela Murias.