Grau y Candamu tamién celebren la Selmana de les Lletres Asturianes

El SNL llocal entama actividaes en solitariu o cola Conseyería d'Educación y Cultura mientres continúa desendolcándose'l programa oficial en dellos puntos del país.

Dende'l vienres pasáu, y hasta'l martes 8, celébrase n'Asturies la XXXIX Selmana de les Lletres Asturianes. Por esti motivu, el Serviciu de Normalización Llingüística de Grau y Candamu organiza dellos eventos que van tener llugar esta tarde y mañana.

En Grau súmase a la Fundación Aula de les Metáfores pal entamu de l'actuación poética-musical que tien llugar tolos años na capiella de Los Dolores dientro del programa oficial de la Selmana. Esti eventu va comenzar a les 19.30 hores y nél van entregase los diplomes del V Premiu de Poesía Selmana de las Lletras, destináu al alumnáu de Primaria y Secundaria del conceyu.

Mañana, a les 12 hores, el mediu millar d'escolines y escolinos matriculaos en Llingua Asturiana y Lliteratura na Escuela d’Educación de 0 a 3 años, la Escuela Bernando Gurdiel, la Escuela Virgen del Fresno, la Escuela de La Mata, l’IES Ramón Areces y l’IES César Rodríguez va aconceyar na Plaza'l Mercáu pa disfrutar d'un conciertu de L+R, actuación que va siguir a un actu d'entrega d'un llote de llibros a les biblioteques de los centros de Grau a cargu de representantes de la conseyería, el conceyu, l'Academia de la Llingua Asturiana y la Universidá d'Uviéu.

Paco Álvarez gana en Candamu

El Palaciu Valdés-Bazán de San Román va acoyer mañana, a les 19 hores, la entrega de premios del III Concursu de Relatos Curtios Conceyu de Candamu. El periodista xixonés Francisco 'Paco' Álvarez ganó en categoría d'adultos gracies a la so obra 'La ponte', mentes que Paquita Suárez Coalla mereció'l segundu premiu con 'Alcordances de cariñu'.

En categoría de 6 a 12 años llevó'l trunfu Andrea López Granda por 'El pirata cantarín', mentes que l'accésit foi pa la so compañera nel Colexu Públicu Prieto Bances, Erika Martínez Hernández, por 'Ragman el pirata'. Tres la entrega de los gallardones va tener llugar un recital poéticu con Jorge Estrada y Xuan Bello.

Uviéu, Corvera, Siero y Xixón

Dientro de la programación oficial, celébrase güei la tradicional llectura pública institucional de testos n'asturianu y gallego-asturiano dende'l meudía na Xunta Xeneral. A les 18 hores va comenzar en Les Vegues l’atopada poética ‘Versovera’, cola participación de Berto García, Ángeles Carbajal, Xaime Martínez, Aida Escudero, Xurde Fernández, Esther García, José Ángel Gayol y Vanessa Gutiérrez, y a les 19 hores nel Auditoriu de Siero, en La Pola, l’espectáculu musical ‘Xentiquina: una mirada a la lliteratura infantil’.

Otra manera, siguen les visites guiaes a delles ciudaes asturianes. El turnu de güei ye'l de Xixón, con un paséu per Cimavilla que comienza a les 19.30 hores.