Antón de Marirreguera tuvo presente nel actu inaugural de la XXXIX Selmana de les Lletres Asturianes

|
Antón de Marirreguera tuvo presente nel actu inaugural de la XXXIX Selmana de les Lletres Asturianes

Acompañando a la primer lluz del día, la poesía de la moza Candela Murias y de Pablo X. Suárez dieron la bienvenida a la gran fiesta de la nuesa lliteratura. La XXXIX Selmana de les Lletres Asturianes echó a andar esti vienres en Llorgozana, parroquia natal d’Antón de Marirreguera, col Alba Poética de les Lletres Asturianes.

De 11 años, vecina d’El Valle y alumna de sestu de Primaria del CEIP Poeta Antón de Marirreguera, Murias recitó ‘El mar qu’escribe foles’, col que quixo rindir homenaxe al escritor llocal, autor del primer poema conserváu de la historia de la lliteratura asturiana, el ‘Pleitu entre Oviedo y Mérida: Sobre la posesión de las cenizas de Santa Eulalia’, del 1639. Xunto con Suárez, ganador del XXIII Premiu Xuan María Acebal de poesía n’asturianu cola obra ‘Little Babilonia, lleeron amás otres creaciones n’asturianu nun actu que tamién taba encuadráu dientro del Programa Cultural Antón de Marirreguera, que lleva programando actividaes poétiques y musicales dende xineru en Carreño, y que tuvo presentáu por Ismael González Arias y Silvia Suárez García, qu’interpretó dellos cantares.

Fernando Padilla, direutor xeneral de Planificación Llingüística y Normalización, y l’alcaldesa de Carreño, Amelia Fernández López, acudieron esti eventu celebráu na escuela de Llorgozana xunto a representantes de la corporación municipal y de la comunidá educativa. Tres l'actu, l'actor Silvino Torre de Factótum Teatro, carauterizáu como Antón de Marirreguera, tuvo trabayando coles escolines y escolinos del centru y el de Quimarán-El Valle p'animalos a la llectura n'asturianu al traviés de xuegos.

Santolaya, Xixón y Avilés

Esta primer xornada de la Selmana de les Lletres Asturianes, que va allargase hasta'l día 8, completóse con un homenaxe a la escritora cabraniega María Xosefa Canellada en Santolaya, que contó cola representación d’una adaptación de la so obra ‘Montesín’ a cargu de Kamante Teatro. Enantes, en Xixón, inaugurábase la esposición ‘Falar ensin parar’, con testos de Carlos González Espina e ilustraciones de Marina Lobo, que va poder visitase hasta'l domingu 20 de mayu nel Centru de Cultura Antiguu Institutu.

La próxima actividá d’esta la gran celebración al rodiu les nueses lletres, dedicada nesta edición a la lliteratura infantil y xuvenil, va ser el llunes n’Avilés. En concreto trátase d’una visita guiada n’asturianu pel cascu históricu, con salida pal públicu xeneral pa les 19.30 hores.

Güei ye’l día caberu p’acutar plaza, yá que la visita ta llendada a 25 persones. La xente interesao pue facelo al traviés del númberu de télefonu 985.106.741 o del corréu electrónicu splnormalizacion@asturias.org.

Uviéu (martes), Xixón (miércoles) y Ribeseya (sábadu 5 y domingu 6) tamién van celebrar salíes guiaes a dellos puntos d’estes poblaciones. Les señes pa inscribise son les mesmes pa que la salida d’Avilés, anque nel casu de la villa del oriente ha de facese, hasta’l vienres próximu, al traviés del teléfonu 985.860.038.

Feria del Llibru n’Asturianu en Candás

De manera paralela, la candasina Antigua Fábrica d’Ortiz celebra dende güei y hasta’l domingu la primer Feria del Llibru n’Asturianu qu’entama’l Conceyu de Carreño. Un total d’ocho llibreríes y editoriales van participar nesti eventu que va acoyer delles actividaes al rodiu de la llingua asturiana nel horariu siguiente: güei, de 10 a 14 y de 17 a 20.30 hores; mañana, de 11 a 14.30 y de 18 a 22.30 hores; y el domingu, de 11 a 14.30 hores.

El Muséu Antón y el Teatru Prendes tamién van ser sede de dalgunos eventos programaos pa estos díes en Candás, como’l recital poéticu d’esta tarde de Xuan Bello (18.30 hores) o la representación de ‘Xuan Soldáu’ (21 hores) a cargu de Carlos Alba ‘Cellero’, de manera respeutiva. D’igual forma, na parte gastronómica de la feria, dellos chigres ufierten el sábadu un menú especial de cena unificáu a 15 euros.

Na semeya, González Arias, Murias y Suárez García.

Contador Estadistiques