La XDLA valora’l llabor normalizador del fútbol asturianu nos XXXIII Premios Andrés Solar

El llabor del fútbol asturianu, representáu nel UC Ceares, el Rosal, el Llosalín y el Stiaua d’Asturies, ye motivu d’entrega del Pegollu de los XXXIII Premios Andrés Solar qu’entama la XDLA. El Madreñazu va pa Mercedes Fernández y el so “discursu d’odiu y xenófobu”.

Estos cuatro clubes abanderen un fútbol diferente al que vemos pel televisor, popular y comprometíu socialmente col so entornu, nel que l’emplegu de la llingua asturiana ye normal na actividá diaria de les entidaes. Asina, la Xunta pola Defensa de la Llingua Asturiana (XDLA) concede-yos esti añu’l Pegollu de los Andrés Solar, col que premia a la entidá o persona que rescamplara pol so trabayu en defensa o promoción del asturianu, reconociendo'l so llabor de puesta en marcha de “proyectos deportivos populares y cooperativos, que visibilicen l'asturianu nos diferentes materiales que xenera la so actividá”.

La parte negativa de los gallardones, el Madreñazu, que reconoz a la persona o entidá que rescamplara pol so llabor negativu pa cola llingua asturiana, ye “pal discursu del odiu y xenófobu de Mercedes Fernández, de nomatu ‘Cherines’, cabezalera de la organización política PP n’Asturies, qu'a lo llargo de los últimos tiempos vien faciendo unes declaraciones cada vez más delirantes y ridícules contra la recuperación del asturianu col únicu fin de arrampuñar cuatro votos de los sectores más ultres y casposos de la sociedá asturiana”. La popular socede nel palmarés d’esti ‘antipremiu’ al so compañeru de partíu Gabino de Lorenzo, delegáu del Gobiernu estatal n'Asturies.

La gala d’entrega, el sábadu 16

El Centru de Cultura Antiguu Institutu va acoyer un añu más la entrega de los Andrés Solar, colos que la XDLA recuerda la figura del escritor fináu n’accidente de tráficu nel 1984 a los 29 años d’edá. La fecha escoyida ye’l sábadu 16, a les 18 hores.

Como tolos años, depués va celebrase una espicha, que nesta ocasión va tener como sede’l propiu centru cultural xixonés.