Pulgar afirma “que yá llegó la hora” de la oficialidá al contar con “la oportunidá y el consensu”

Les bufandes del fútbol popular qu’emplega l’asturianu con normalidá’l nel so día a día llucieron na entrega de los XXXIII Premios Andrés Solar, na que Mercedes Fernández dexó ensin recoyer el Madreñazu. La reivindicación de oficialidá nun faltó: “tiense la oportunidá y el consensu”, afirmó Carlos Pulgar, voceru nacional de la Xunta pola Defensa de la Llingua Asturiana (XDLA).

“Nun ye tiempu pa la medrana, nin pa postergar con argumentos ridículos esta oportunidá. Les coses fáense cuando se puen facer, nun se dexen pa cuando sía imposible. Llegó la hora; agora ye’l momentu. Tiense la oportunidá y el consensu. Foron meses de conversaciones y actividá pa demostrar a la nuestra representación política cómo furrula esta ferramienta y como, d’una manera cenciella, pue dase solución a un problema que la democracia asturiana vien arrastrando demasiaos años”, apuntó Pulgar na so intervención nel salón d’actos del xixonés Centru de Cultura Antiguu Institutu tres citar la iniciativa ‘Proyectu 2018 pola Oficialidá’ cola que la XDLA pretende poner en marcha una reforma del Estatutu d’Autonomía pa incluyir nel mesmu esti derechu fundamental “que lleven negándonos años y décades”.

El compromisu de partíos favoratibles a la oficialidá tres les conversaciones calteníes pola XDLA con toles formaciones con representación, a esceición del PP, fai qu’esti procesu pueda abrise nesta llexislatura al algamar l’apoyu d’una cuarta parte del Parllamentu, esto ye 12 diputaos, una de les dos posibles víes pa ponelu en marcha. “D’eses conversaciones vien el nuestru convencimientu de que se va presentar en nun pasando munchos meses, igual selmanes, una propuesta pa la reforma del Estatutu d’autonomía. Tamos trabayando tamién con ellos na redacción que queremos que tenga esi artículu 4 nel que se va recoyer la oficialidá del asturianu y del gallego-asturiano. Desque esa proposición se presente, tien toles posibilidaes d’aprobase, porque la FSA decidió nel so congresu de setiembre la so posición favorable. Nun ye namás una cuestión d’aritmética, pero l’aritmética ye testerona y 27 votos son abondo”, apuntó Pulgar.

El voceru de la XDLA añadió que “les selmanes que pasen nesi trámite van ser cruciales pa construir el consensu y sumar votos perriba d’esos”, polo que llamó a la sociedá asturiana a movilizase na cai  pa demostrar que les asturianes y asturianos quieren “convivir nun marcu más xustu, onde los derechos nun dependan de la llingua que caún o caúna escueya  pa vivir” y facer que los partíos indecisos se decaten de “cuála ye la decisión acertada”. “Ye’l momentu d’emburriar con toles fuercies, de creyer y suañar”, afaló.

Cuatro premiaos

Nel so discursu, Pulgar tamién tuvo pallabres pa los cuatros premiaos, l’UC Ceares, el Rosal, el Llosalín y el Stiaua d’Asturies, “equipos de fútbol qu’usen con normalidá l’asturianu nes sos xeres diaries”. Asina, destacó que “la normalización del asturianu ye fundamental pal futuru d’esta llingua y la normalización n’ámbitos de tanta atracción popular y de participación de la mocedá ye tovía más importante”.

Sobre la merecedora del Madreñazu, la popular Mercedes Fernández ‘Cherines’ “como representante del discursu del odiu hacia l’asturianu”, que nun acudió a recoyer el gallardón, apuntó que “nos últimos tiempos ta empeñada en ser la cabezalera de les ridiculeces y los argumentos delirantes p’atacar l’asturianu, la so normalización y cualquier avance que pueda haber pal reconocimiento d’unos mínimos derechos a les persones que falamos nesta llingua”. D’igual forma, citó  alos medios de comunicación que faen d’altavoz de “esti discursu xenófobu y del odiu”, “medios, que, casualmente, siempre escaecen recordar a l’audiencia les militancies ultres, xenófobes, etc., de los xeneradores d’esti discursu”.