García Granda, merecedor del Pegollu de los XXXIV Premios Andrés Solar

El vienres 21 ye la fecha marcada pa la entrega de los XXXIV Premios Andrés Solar, de los que yá se conocen los ganadores. El Pegollu ye pa Santiago García Granda, rector de la Universidá d’Uviéu, mentes que’l Madreñazu llévalu Pablo Casado, presidente del PP.

Los gallardones que la Xunta pola Defensa de la Llingua Asturiana (XDLA) entamen en memoria d’Andrés Solar, escritor fináu n’accidente de tráficu nel 1984 a los 29 años d’edá, falláronse esta mañana nes sos dos vertientes. La positiva ye’l Pegollu, col que la organización cívica recompensa a “una entidá o persona que rescamplara pol so llabor en defensa o promoción del asturianu”.

Esti añu’l so merecedor ye García Granda “pol llabor que vien llevando alantre na normalización del asturianu na máxima institución educativa, investigadora y científica d’Asturies”. Dende que’l caderalgu de Química Física llegara’l cargu, la Universidá d’Uviéu punxo en marcha delles midíes pa dar más pesu al idioma, como se comprometiera enantes de les eleiciones al Rectoráu, y esti añu protagonizó la primer conferencia d’un rector n’asturianu con motivu del VIII Día de les Ciencies Asturianes.

“Discursu del odiu”

Nel llau contrariu ta’l Madreñazu, l’antipremiu “que reconoz a la persona o entidá que rescamplara pol so llabor negativu pa cola llingua asturiana”. Esti añu’l so ganador ye’l popular Casado pol so “discursu del odiu y negacionista xenófobu”, políticu que “nos últimos tiempos vien faciendo declaraciones desinformaes y malintencionaes sobre l'asturianu".

La gala de entrega de los Andrés Solar va celebrase’l vienres 21 a les 19 hores nel xixonés Antiguu Institutu. Tres l’actu, la XDLA va entamar una espicha nel propiu centru cultural.

Na semeya, García Granda, a la izquierda, nel actu d'investidura como doctor 'honoris causa' a Carmine Zoccali celebráu esti cursu.