La XDLA entrega en Xixón los XXXIII Premios Andrés Solar

El Pegollu ye pal llabor normalizador del fútbol asturianu, representáu en cuatro equipos qu'usen l'asturianu nel so día a día, y el Madreñazu pa Mercedes Fernández.

Estos clubes son l'UC Ceares, el Rosal, el Llosalín y el Stiaua d’Asturies, "proyectos deportivos populares y cooperativos, que visibilicen l'asturianu nos diferentes materiales que xenera la so actividá”, apunten dende la Xunta pola Defensa de la Llingua Asturiana (XDLA). Mentes, l'antipremiu, el Madreñazu, va “pal discursu del odiu y xenófobu de Mercedes Fernández, de nomatu ‘Cherines’, cabezalera de la organización política PP n’Asturies, qu'a lo llargo de los últimos tiempos vien faciendo unes declaraciones cada vez más delirantes y ridícules contra la recuperación del asturianu col únicu fin de arrampuñar cuatro votos de los sectores más ultres y casposos de la sociedá asturiana”.

La gala d'entrega de los Andrés Solar, na que nun s'espera la asistencia de la popular, va celebrase esta tarde, a les 18.30 hores, nel xixonés Centru de Cultura Antiguu Institutu. Na mesma va participar el comentarista deportivu Miguel Fernandi y va actuar Ún de Grao.

La tradicional espicha de la XDLA va celebrase nesta ocasión nel mesmu Antiguu Institutu.

Na semeya, el Rosal y el Stiaua saquen una pancarta de sofitu al asturianu mientres un duelu de la temporada pasada.