La selmana última rexistró una media diaria de más de 400 contaxos

Esta fin de selmana detectáronse 1.301 casos nuevos de COVID-19, 470 el domingu con un tasa de positividá del 9,96 por cientu.

Un total de 2.855 persones dieron positivu en pruebes PCR na selmana última, lo que dexa una media diaria de 408 contaxos de coronavirus SARS-CoV-2. Na anterior esta cantidá foi de 334, siguiendo col ascensu imparable que se vien produciendo nesta segunda fola: 39, 46, 52, 83, 92, 92, 150, 210 y 272.

Tres los 470 d'ayeri, los 280 del sábadu y los 551 del vienres, segunda cifra más alta de tola pandemia depués del récor de 574 del xueves, la serie queda en 15.557, 2.855 casos más que'l domingu pasáu, cuando había 12.702. No que respeuta a la tasa de positividá, ésta foi del 9,96 por cientu con 4.715 PCR feches, mentes que nos díes anteriores quedó en 6,65 y 9,5, col tope hasta la fecha rexistráu tamién el xueves, un 10,16 por cientu.

43 finaos

Les cifres de muertes tán siendo les más altes dende l'entamu del andanciu. Nos trés díes últimos hebo que llamentar 43 perdes: 15 el vienres, 18 el sábadu y 10 ayeri.

No que respeuta a les hospitalizaciones, hai 796 pacientes ingresaos con confirmación o sospecha de COVID-19 n'Asturies, a los qu'hai que sumar los 129 que tán na UCI. Son 116 y 18 más que'l xueves, de manera respeutiva.