La pandemia sigue descontrolada: 574 casos con un 10,16 de positividá

Son les cifres más altes de tol andanciu.

A falta de la comunicación oficial por parte de la Conseyería de Salú de la pandemia de COVID-19, ayeri superáronse tolos rexistros. Detectáronse un total de 574 contaxos, 139 más que'l xueves pasáu, cuando se rexistró'l récor de casos nuevos con 435.

La tasa de positividá foi del 10,16 por cientu, con 5.646 pruebes PCR feches, doblando per primer vegada'l porcentaxe que pon como llende la Organización Mundial de la Salú (OMS) pa tener controlada la situación, un 5 por cientu. Hasta'l momentu la cifra más alta yera del 9,87 por cientu, correspondiente al 23 d'ochobre.

Na xornada hebo que llamentar 14 muertes, la tercer peor cifra del andanciu. Perdieron la vida cola enfermedá cuasada pol coronavirus SARS-CoV-2 doce homes de 92, 91, 90, 89, 87, 87, 85, 84, 83, 83, 79 y 71 años y dos muyeres de 90 y 89, de los que dos residíen nun centru de mayores.

No que respeuta a les hospitalizaciones, hai 680 pacientes ingresaos con confirmación o sospecha de COVID-19, amás d'otros 111 na UCI. Son 19 y 3 más que'l miércoles, de manera respeutiva.