La selmana pasada siguieron baxando los contaxos hasta los 270 diarios de media

Nos trés díes últimos esti descensu frenóse.

La selmana pasada rexistráronse 1.887 contaxos, polos 2.569 de l'anterior, siguiendo la tendencia descendente d'esta quinta fola, al pasar de 194.177 casos confirmaos –nun primer momentu comunicáronse 194.081– a 196.064. Supón 270 casos diarios de media.

D'esta forma'l país torna a tener cifres asemeyaes a les que tenía nos díes últimos de payares y primeros d'avientu. Desque Asturies.com vien rexistrando la media de contaxos diarios nel periodu d'una selmana, a lo último d'agostu del 2020, esti datu evolucionó asina: 39, 46, 52, 83, 92, 92, 150, 210, 272, 334, 408, 508, 344, 252, 194, 125, 101, 78, 101, 167, 292, 421, 482, 383, 226, 154, 135, 144, 113, 113, 119, 115, 121, 126, 115, 84, 52, 49, 53, 51, 50, 55, 51, 57, 196, 448, 493, 423, 289, 194, 133, 77, 60, 42, 20, 12, 13, 11, 13, 17, 22, 32, 29, 70, 175, 322, 427, 632, 1.032, 1.905, 2.355, 3.143, 2.538, 1.831, 1.174, 756, 495 y 367, hasta los 270 actuales.

Cuatro finaos

Esta fin de selmana esti descensu, sicasí, vio un pequeñu frenu. Si na anterior comunicáronse 745 positivos, nésta hebo 865: 354 el vienres, 305 el sábadu y 206 ayeri.

Tamién aumentó'l númberu d'hospitalizaos, pasando de 164 a 166. D'ellos 147 tán en planta, 4 más, y 19 na UCI, 2 menos.

Sí baxó la cantidá de finaos cola enfermedá cuasada pol coronavirus SARS-COV-2. Rexistráronse cuatro muertes, qu'asitien el total del andanciu en 2.506: un home de 88 años el viernes; una muyer de 72 el sábadu; y ayeri una muyer de 96 y un home de 87.

Na semeya, dos sanitaries preparen les dosis pa la vacunación contra la COVID-19.