El Conseyu de Gobiernu aprueba la flexibilización de restricciones

|
Conseyu de Gobiernu en Taramundi

Van entrar a valir esti sábadu. El xueves rexistráronse 206 casos de COVID-19.

La propuesta de la Conseyería de Salú pa flexibilizar restricciones por mor de l'ameyoramientu de datos del andanciu nesta quinta fola aprobóla'l Conseyu de Gobiernu celebráu esta mañana en Taramundi. Asina, dende esta medianueche va poder fumase en terraces siempre qu'haya una distancia col restu de veceros de 2 metros que tamién ha de caltenese cuando se consuma tabacu na vía pública.

Elimínense d'igual forma les cuarentenes de contautos estrechos, con independencia de la so situación vacunal, y los clubes deportivos profesionales van poder usar tol aforu de les sos instalaciones, anque siempre con mázcara. Ésta tamién sigue siendo obligatoria n'espacios d'interior nos que’l so usu nun pueda ser continuada, como na hostelería.

Una muerte

Ayeri detectáronse 206 casos nuevos de COVID-19. Son 80 menos que'l miércoles, cuando se comunicaron 286.

Hebo que llamentar na xornada la muerte d'una muyer de 92 años. Ye la 2.502 del andanciu depués d'una revisión de los datos, yá que na actualización anterior de les cifres oficiales, correspondiente al martes, la cifra total taba en 2.477.

164 pacientes tán ingresaos con confirmación o sospecha de COVID-19, en planta 143 y na UCI 21. Son 18 menos y 1 más que'l miércoles, de manera respeutiva.

Semeya obra d'Armando Álvarez.

Contador Estadistiques