367 contaxos diarios de media na selmana pasada

|
367 contaxos diarios de media na selmana pasada

Sigue la tendencia descendente de positivos nesta quinta fola del andanciu. Esta fin de selmana finaron 13 persones cola enfermedá causada pol coronavirus SARS-COV-2.

La selmana pasada rexistróse una media de 367 casos diarios, inferior a les dos anteriores, cuando quedó en 486 y 756. Lloñe queden les cifres que se dieron del 10 al 17 de xineru, cuando hebo 3.143 positivos diarios de media.

El total de casos quedó en 2.569, al principiar esti periodu con 191.512 contaxos –depués d'una revisión, yá que nun primer momentu comunciáronse 191.489– y finar con 194.081. Na fin de selmana informóse del rexistru de 745, polos 1.106 de l'anterior, que se repartieron en 386 el vienres, 196 el sábadu y 163 ayeri.

Desque Asturies.com vien rexistrando la media de contaxos diarios nel periodu d'una selmana, a lo último d'agostu del 2020, esti datu evolucionó asina: 39, 46, 52, 83, 92, 92, 150, 210, 272, 334, 408, 508, 344, 252, 194, 125, 101, 78, 101, 167, 292, 421, 482, 383, 226, 154, 135, 144, 113, 113, 119, 115, 121, 126, 115, 84, 52, 49, 53, 51, 50, 55, 51, 57, 196, 448, 493, 423, 289, 194, 133, 77, 60, 42, 20, 12, 13, 11, 13, 17, 22, 32, 29, 70, 175, 322, 427, 632, 1.032, 1.905, 2.355, 3.143, 2.538 y 1.831, 1.174, 756 y 495, hasta los 367 actuales.

213 pacientes

Sigue descendiendo'l númberu d'hospitalizaos. Hai agora 213, polos 231 del xueves, de los que 193 tán en planta (17 menos) y 20 na UCI (1 menos).

Por contra, sigue habiendo una cantidá alta de muertes. Esta fin de selmana llamentamos 13: 4 muyeres de 92, 89, 85 y 76 años y 4 homes de 89, 89, 68 y 61 el vienres, 2 homes de 92 y 75 y 1 muyer de 80 el sábadu, y ayeri 2 homes de 85 y 66.

No que va d'andanciu finaron un total de 2.468 persones –incorporáronse 2 más a la serie non contabilizaos nos díes previos– con COVID-19.

Na semeya, vacunación cola segunda dosis a una neña nel Hospital Vital Álvarez Buylla de Mieres.

 

Contador Estadistiques