La FSA vota a favor de la propuesta de reforma del reglamentu de la Xunta pal usu del asturianu

La toma en consideración de la propuesta d’Asturies pela Izquierda pa reformar el reglamentu de la Xunta Xeneral pa permitir l’usu del asturianu na Cámara non sólo a diputaos salió alantre colos votos favoratibles de la FSA y Podemos. Los socialistes confirmaron que quier ameyorala al traviés d’enmiendes a la mesma.

El votu del partíu nel Gobiernu, clave pa la tramitación d’esta iniciativa, yera l’únicu que faltaba por conocer y la so vocera María Dolores Carcedo apuntaba na so intervención que la sofitaba “pa tratar d’evitar una involución que nun compartimos”, en referencia a la torga del usu del asturianu na Xunta Xeneral, que, recordó, yera normal dende enantes de l’aprobación del reglamentu actual de la Cámara, del 1997, que permite el so usu a diputaes y diputaos, y de la propia Llei d’Usu. “Nunca hebo problema. Toos nos entendíemos y naide vetó’l so usu”, señaló al empar que “la novedá ye que dalguien diga que nun lo entiende”, en referencia a la torga del so emplegu a Berta Piñán na Comisión de Cultura, Política Llingüística y Turismu por parte de la popular María Gloria García Fernández en comuña con VOX y Ciudadanos.

Sobre l’informe del Lletráu Mayor de la Xunta Xeneral, al que fixeron referencia previamente les cuatro fuercies que votaron en contra, esto ye, PP, Ciudadanos, Foro y VOX, y que dicía que la propuesta d’Asturies pela Izquierda nun iguaba la problemática, apuntó que la FSA siguió’l conseyu de “nun llevalu per llectura única” y llamó a ameyoralu “nel trámite d’enmiendes”. Por último, criticó que la situación actual ta provocada pola entrada de la derecha estrema na Cámara, “que ta arrastrando a otros grupos parllamentarios”.

El teatru de VOX

Ángela Vallina encargóse de defender la propuesta de modificar l’artículu 11 del reglamentu de la Xunta Xeneral pa defender “el derechu d’usar la llingua asturiana”, pa lo que fixo referencia al artículu 4 del Estatutu d’Autonomía. “Esto nun va d’oficialidá güei, nin de que l’asturianu sía más o menos d’otres llingües, nin de garantizar la enseñanza a tolos niveles”, apuntó, sinón “de nun permitir retroceder” l’usu “de la llingua tradicional d’Asturies” na Cámara.

El primeru n’intervenir, per orde de menor a mayor representación, foi Ignacio Blanco. El voceru de VOX quixo contestar les declaraciones d’Adrián Barbón sobre’l so supuestu complexu d’inferioridá de sentimientu d’asturianía poniendo una montera picona que llucía los collores de la bandera española, queriendo entrega-y otra al presidente del país.

“La reforma nun val pa nada, tamos informaos”, aseguró, pa depués criticar que “quiere imponenos una llingua que nun comprendemos”, en referencia al asturianu estandar, “idioma que nun se fala nos pueblos”. Por último dixo que l’asturianu “ye l’oxetivu del nacionalismu asturianu” y que VOX “nun quier crear l’embrión de la bestia”.

Los bables de Foro

Pedro Leal, de Foro, refieróse a “los distintos bables” y apuntó que se taba tratando “un alderique que nun esiste na sociedá”. Darréu llamó a evitar que s’utilice la llingua “como barrera” y tornó a refugar la esistencia “del consensu social necesariu pa reformar l’Estatutu d’Autonomía pa introducir la oficialidá”, opiniéndose tamién a una “oficialidá reglamentaria” que s’atreva “a discutir al castellanu los espacios d’alderique”.

L’únicu n’emplegar l’asturianu foi Rafael Palacios, diputáu de Podemos, que calificó la propuesta d’Asturies pela Izquierda de “meyorable y necesaria”. “L’asturianu y el gallego-asturiano tienen que tener el calter de llingües oficiales”, demandó al tiempu qu’esixó abrir l’alderique de la reforma del Estatutu d’Autonomía: “Ye una obligación democrática y la única manera de qu’esta situación bochornosa nun se repita –en refencia a lo asocedío con Piñán–. Demientres, tamos a favor de la toma en consideración d’esta propuesta”.

Por parte de Ciudadanos tomó la pallabra Luis Armando Fernández Bartolomé, que criticó la reforma que se fixera del reglamentu al comienzu de la llexislatura pa dar grupu parllamentariu a les formaciones con dos diputaos –IX, Foro y VOX– y acusó a la coalición de trayer esta propuesta “por marketing eleutoral” al considerar que “ye inútil”, faciendo referencia al informe del Lletráu Mayor. Por último, llamó a “una reforma integral del reglamentu”.

Tamién fixo referencia a dichu informe Pablo González Menéndez. “Ye clarísimu”, afirmó, calificando la propuesta d’Asturies pela Izquierda de “precipitada y chapucera”, p’acusar darréu a la coalición de buscar “confrontación política” y “crear problemes y amenacies a dalguna diputada popular”. Estes pallabres últimes indignaron a Vallina, qu’esixó al popular que les retirara, cosa que fixo a medies: “el qu’abre la caxa los truenos...”, dexó cayer.

Na semeya, zona ocupada pol grupu parllamentariu socialista na Xunta Xeneral.