Modifícase'l Reglamentu de la Xunta p'ampliar el votu telemáticu

Entovía ta pendiente el cambiu nel artículu 11 que permita l'emplegu del asturianu.

El BOPA de güei espublizó la modificación del artículu 111.2 del Reglamentu de la Xunta Xeneral aprobada ayeri por unanimidá en Plenu. Ésti yá se cambiara'l 5 de febreru pa incorporar el votu telématicu, que cola pandemia actual fíxose entá más importante al ponese de manifiestu una necesidá doble: la estensión a les comisiones y l'ampliación de los supuestos habilitantes pal so exerciciu.

Asina, dichu artículu queda redautáu asina: "Nos casos d'embarazu, maternidá, paternidá, ingresu hospitalariu o enfermedá grave, asina como en situaciones esceicionales qu'impidan la presencia normal de los Diputaos na cámara, la Mesa de la cámara, motivadamente, podrá autorizar la emisión del votu telemáticamente, pol procedimientu que determine, oyida la Xunta de Voceros, y que garantizará la identidá del votante y el sentíu del votu". La reforma del Regalmentu entró a valir güei cola so espublización nel BOPA.

Mentes entovía sigue pendiente la modificación del artículu 11 pa evitar que se-y pueda torgar a naide l’emplegu de la llingua asturiana na Xunta Xeneral, como asocedió esta llexislatura en delles ocasiones tres la intervención de la conseyera Berta Piñán na Comisión de Cultura, Política Llingüística y Turismu pa dar a conocer los planes del so departamentu. Esti pasu, a diferencia del aprobáu ayeri, ta allargándose nel tiempu, yá que la toma en consideración de la propuesta d’Asturies pela Izquierda aprobóse'l 23 d'ochobre.