La Xunta Xeneral va tratar una propuesta pa reformar el reglamentu pal usu del asturianu que nun ye solución pal Lletráu Mayor

L’usu del asturianu na Xunta Xeneral nesta llexislatura peligra pol filibusterismu de los sectores contrarios al idioma. La reforma propuesta por Asturies pela Izquierda, que se va tratar nel Plenu próximu, nun solucionaría’l problema según el criteriu del Lletráu Mayor, que defende que nel casu de qu’un diputáu diga nun entender l'asturianu, la única opción ye la traducción simultánea.

La Xunta de Voceros trató ayeri sobre la propuesta de modificación del reglamentu de la Xunta Xeneral pa permitir l’usu del asturianu na Cámara non sólo a los diputaes y diputaos, sinón a cualquier persona. La toma de consideración de la mesma va tratase la selmana próxima en Plenu tres refugase la llectura única pela vía d’urxencia, como pretendía Asturies pela Izquierda p’axilizar la so tramitación.

Podemos ye la única formación que confirmó’l so votu favoratible a la propuesta, mentes que la FSA, necesaria p’algamar los 23 votos suficientes pa la so aprobación tres la negativa del restu de fuercies, apuntó que diba estudialo nos díes próximos pa tomar una decisión. En concreto, el grupu parllamentariu d’IX pide que se modifique l’artículu 13 del reglamentu pa que quede asina: “Nel marcu de lo dispuesto pol Estatutu d’Autonomía y, nel so casu, pola llexislación que lo desendolque, tanto los Diputaos nel exerciciu de les sos funciones parllamentaries como cualquier otra persona que compareza énte la Cámara podrán utilizar el bable/asturianu”.

Esti cambiu, sicasí, según l’informe fechu díes atrás pol Lletráu Mayor de la Xunta Xeneral, Alberto Arce, nun sería la solución, yá que nel casu de qu’un diputáu dixera nun entender l’asturianu naide nun podría emplegar l’idioma na Cámara teniendo en cuenta l’artículu 23.2 de la Constitución, siendo necesariu un serviciu de traducción simultánea que nun hai.

Filibusterismu de la derecha

L'intentu de torgar l'usu del asturianu alegando intercomprensión ye una estratexa nueva de la derecha que s'opón al usu del asturianu y qu'alega agora una supuesta falta de comprensión que nunca existió dende que se fala na Xunta Xeneral n'asturianu hai cuasi 20 años, tres de les primeres intervenciones de Xuan Xosé Sánchez Vicente.

Esta práutica instrumental pa torgar los debates podría, según el Lletráu Mayor, dase mesmamente nuna cámara na que se fixera usu d'una llingua oficial, como la de la vecina Galicia, onde cualquier diputáu podría alegar que nun entiende una llingua, anque esta seya oficial, amparándose na Constitución, que namás obliga a conocer el castellanu.

Semeya obra de José Vallina.