IX pon una reforma de la Llei d'Usu como ún de los trés exes de la propuesta a Podemos

Un Plan de Choque Social, l’incrementu de la calidá democrática y la defensa de la llingua son los trés exes vertebradores de la confluencia parlamentaria que propón IX a Podemos. Plantega una reforma de la Llei d’Usu, "cola meta na cooficialidá".

Ramón Argüelles, coordinador xeneral d’Izquierda Xunida (IX) y Jaime Gareth, secretariu de converxencia, ufrieron a Podemos –que respondiera afirmativamente con una propuesta de reunión una carta de la coalición fecha pública pol propiu Argüelles– una axenda llexislativa inmediata cola que tratar de superar la paralís del Gobiernu. “Tien que ser una ruptura colo qu’hai establecío anguaño. Tien qu’haber un cambiu. Estos alcuerdos programáticos –qu’oxalá podamos llegar a ellos– tienen que suponer un cambiu y una suma pa los asturianos y asturianes. Tien que ser leitmotiv d’esti alcuerdu”, destacó Argüelles.

L’ex alcalde de Ḷḷena plantegó los trés exes como una “fueya de ruta” con Podemos abierta a otres propuestes que pueda presentar la formación morada, poniendo siempre como prioridá el Plan de Choque Social. “Hai que centrase nos escesos que se cometieron, sobre manera, colos más desfavorecíos”, avisó.

Esta iniciativa incluyiría, al menos, una Llei d’Emergencia Social nueva que permita axilizar derechos y prestaciones como’l Salariu Social, la disponibilidá de vivienda en casos de desagospios o la garantía de suministros d’agua y enerxía. El segundu exe d’aición, l’incrementu de la calidá democrática, pretende una llei eleutoral nueva que complete la meyora de la proporcionalidá, con un incrementu del control de los gastos eleutorales que, amás, permita conocer l’orixe de los fondos.

El plan de choque llexislativu d’IX zárrase cola reforma de la Llei d’Usu y Promoción del Bable/Asturianu, “cola meta na cooficialidá del asturianu”, apunten dende la organización. La primer reunión con Podemos pa tratar estos asuntos podría celebrase’l llunes viniente.

Fin de los balones d’oxíxenu al PSOE

Sobre la intención del presidente Javier Fernández  de sumar fuercies pela izquierda pa lo que queda de llexislatura, Argüelles aseguró que “los balones d’oxíxenu (al PSOE) finaron”. “A estes altures, IX gastó tolos cheques en blancu col PSOE. Si se quieren sumar, como diz el refrán, obres son amores y non bones razones. Cuando concretemos con Podemos dalgunes d’estes midíes, darréu van ponese na Xunta y ehí los 14 votos d’IX más Podemos veremos si cuenten col apoyu de los 14 del Partido Socialista. Entós sí habrá una verdadera voluntá de cambiu”, afirmó.