Argüelles insiste na necesidá d'un xiru a la izquierda del Gobiernu

|
Ramón Argüelles en Presidencia

"Nun podemos perder otros dos años", afirma'l coordinador xeneral d'IX.

Ramón Argüelles manifestó la so disposición a llegar a alcuerdos cola FSA siempre qu'éstos vayan dirixidos a ameyorar la situación de la mayoría de la población. “Hai dos años Izquierda Xunida facilitó la investidura de Javier Fernández por dos motivos fundamentales: primero, pa que nun gobernase la derecha y, segundo, por sacar alantre unes cuantes midíes, sobre manera de tipu social, medioambiental, participativo..., que foran a ameyorar esta sociedá asturiana. Dos años más tarde, dámonos cuenta de qu'esi alcuerdu pa investir un presidente nun se cumplió práuticamente en nada y creemos que, tres dos años perdíos, tenemos que cambiar el rumbu o, muncho me temo, vamos a perder otros dos años”.

IX presentó recién una axenda de trabayu con trés exes centrales –ún d'ellos enfocáu nuna reforma de la Llei d'Usu y Promoción del Bable/Asturianu “cola meta na cooficialidá del asturianu"– a Podemos, "que son los nuesos aliaos naturales, pa nun perder otros dos años en coses mui importantes, como la probeza enerxética", el reforciamientu de los servicios sociales o la proteición del medio ambiente. "Esta axenda debería de facela'l propiu Gobiernu, pero yá que nun fixeron nada nestos dos años y nun tienen nenguna voluntá, vamos ser nosotros los que forciemos, xunto colos nuesos aliaos Podemos na Xunta Xenera, 14 pa 14 (9 de Podemos y 5 d'IX), al PSOE a xirar la estratexa".

Nesi sen, apuntó que los socialistes van tener en setiembre "la oportunidá de ver la primeres lleis y que'l xiru sía a la izquierda, y non como hasta agora: pautar la fiscalidá cola derecha pa que paguen menos los que más tienen, y pa sacar presupuestos cola derecha".

 

Contador Estadistiques