IX propón a Podemos facer un bloque d'izquierda na Xunta

Plantega sumar los 9 diputaos moraos colos 5 de la coalición p'abrir un marcu de negociación nuevu cola FSA-PSOE, que tamién suma 14 escaños. L'axenda inclúi la oficialidá.

Nuna carta roblada por Ramón Argüelles y dirixida a Daniel Ripa, secretariu xeneral de Podemos, el coordinador xeneral d'Izquierda Xunida (IX) tresllada la so intención de "caltener un alcuentru cola vuesa fuercia política lo más pronto posible pa esplorar les posibilidaes d'algamar un alcuerdu sobre la base de los oxetivos qu'esplicitamos nel documentu" axuntu, de nome 'Una propuesta de cambio para sumar izquierda hasta el final de la legislatura'. Asina, solicita a Ripa "fecha y llugar pa que podamos iniciar les conversaciones y estudiar fórmules de cooperación, orientaes a algamar n'Asturies un cambiu real a la izquierda, a la midida de les necesidaes de la sociedá asturiana".

D'esta forma, IX quier buscar fórmules que permitan poner en marcha polítiques d'izquierda y dar respuesta a la "situación d'esceición" na que la coalición asitia a Asturies. El documentu trata de dellos puntos, ente los que ta ún dedicáu a la llingua asturiana, na qu'espresa que "reforzaremos la implantación, normalización y utilización de la llingua asturiana nes Alministraciones, la publicidá institucional, los medios de comunicación, sobre manera la radiotelevisión pública, y l'ámbitu educativu", y "qu'avanzaremos nel llogru de la oficialidá de la llingua mediante la correspondiente reforma del Estatutu d'Autonomía".

La militancia quier caltener la identidá del partíu

Nel referéndum celebráu'l vienres ente la militancia asturiana d'IX sobre la identidá del partíu, resultó ganadora con un 94 por cientu del total la opción a "asegurar la identidá y la presencia d'Izquierda Unida/Izquierda Xunida nes eleiciones del 2019". Ello significa, que, nel casu de repetir coalición con Podemos n'Asturies como nes Estatales, esta candidatura nun llevaría'l nome de Xuníos Podemos, sinón la marca completa IX.