Podemos respuende a la carta d'IX con una propuesta de reunión

Daniel Ripa encamienta a Ramón Argüelles a buscar una vía p'algamar "una alternativa con voz propia" pa plantar cara al bipartidismu.

"Con esta carta convídote, en fin, a afitar esa reunión na que podamos esplorar el camín hacia una alternativa que dea por desaniciada la vía d'adoptar un rol subordináu énte'l bipartidismu imperante n'Asturies; una alternativa con voz propia", apunta'l secretariu xeneral de Podemos, qu'añade que "mirando al futuru, toi convencíu de que podemos poner la primer piedra de l'alternativa qu'Asturies necesita". D'igual forma, llamenta qu'Argüelles unviara la so carta primero a los medios de comunicación qu'al so destinatariu, polo que resalta nel testu qu'él fixo lo contrario.

Nel restu del mensaxe, Ripa destaca'l llabor de Podemos y les candidatures de xunidá popular nel país nestos dos años y critica'l papel del Gobiernu de Javier Fernández: "ta ancláu al so propiu pasáu, pero, na nuesa opinión, ensin capacidá política pa revertir el so aisllamientu, y peor entá, ensin nenguna propuesta concreta y ilusionante, dirixida a la mayoría social, que realizar". Nesi sen refuga cualquier alcuerdu de gobernabilidá cola FSA y resalta que "podemos ser mayoría, y podemos construyir una alternativa de Gobiernu que redirixa toles enerxíes d'Asturies hacia un mayor progresu social y hacia una recuperación económica qu'aproveche los enormes recursos de la nuesa tierra".