García Riestra recibe por fin, a títulu póstumu, la Medaya d'Oru d'Asturies

La Mesa de la Xunta decidiera entamar col procesu de concesión va agora un añu.

El Conseyu de Gobiernu aprobó ayeri la entrega, a títulu póstumu, de la Medaya d'Oru d'Asturies a Vincent García Riestra "en reconocimientu a la so defensa de la democracia y los sos valores". Nacíu en La Pola Siero nel 1925, tuvo qu'exiliase en Francia con motivu de la Guerra Civil, onde combatió na Segunda Guerra Mundial, siendo deteníu tres la ocupación nazi.

Los alemanes treslladáronlu al campu de concentración de Buchenwald, asitiáu na redolada de la ciudá alemana de Weimar, qu'a pesar de nun ser un campu d'esterminiu sí cobró numberoses víctimes polos trabayos forzaos, los esperimentos médicos y les condiciones de vida de les prisioneros. Nel momentu de la so muerte, en mayu del añu pasáu, yera l'últimu sobreviviente español vivu de Buchenwald.

El restu de la so vida dende la lliberación dedicóla a contar la so esperiencia a escolinos en centros educativos franceses col oxetivu de concienciar sobre los horrores del fascismu y defender los valores democráticos, lo que lu llevó, xunto a otros méritos, a recibir la condecoración de más rangu de la República Francesa, la Legion d'Honneur, y a tener l'honor de poner el nome a una cai na población occitana de Periguers na que residía. Escaecíu poles autoridaes asturianes y españoles per décades, la so historia llegó al nuesu país de la mano de Xuan Santori y la so obra ‘42.553: depués de Buchenwald’, que mereció'l XXIII Premiu Máximo Fuertes Acevedo d'ensayu, correspondiente al 2017.

Foi nesi momentu, cola so visita a Asturies por mor de la espublización del llibru, cuando comenzaron los reconocimientos a la so figura, qu'agora se coronen cola Medaya d'Oru del país, anque a títulu póstumu. "Rendimos asina tributu al sobreviviente español últimu del campu de concentración nazi de Buchenwald, recuperando la memoria democrática", declaró ayeri'l presidente Adrián Barbón.

Na semeya, García Riestra y Santori na presentación en xunu del 2018 del llibru que cuenta la historia del polesu, actu que foi'l primer homenaxe a la so persona nel país.