'42.553. Depués de Buchenwald' edítase tamién castellanu

|
Cartelu '42.553. Después de Buchenwald' de Xuan Santori

L'ensayu de Xuan Santori que recueye la historia de Vincent García Riestra ganó'l XXIII Premiu Máximo Fuertes Acevedo, correspondiente al añu 2017.

Escosaes les dos primeres ediciones en llingua asturiana, Trabe asoleya agora, dos años depués d'espublizase, la torna al castellanu de '42.553. Depués de Buchenwald' baxo'l títulu de '42.553. Después de Buchenwald'. Marta López encargóse de traducir la obra na que Santori reflexona sobre la condición humana y la sobrevivencia nel deliriu de los campos de concentración.

Esti llibru esitosu dio a conocer n'Asturies la trayeutoria vital de García Riestra, nacíu en La Pola Siero nel 1925, que tuvo qu'exiliase a Francia na Guerra Civil. Combatió contra los nazis na Segunda Guerra Mundial, siendo deteníu cuando la ocupación y treslladáu al campu de concentración de Buchenwald, asitiáu na redolada de la ciudá alemana de Weimar, que pese a nun ser un campu d'esterminiu sí cobró numberoses víctimes polos trabayos forzaos, los esperimentos médicos y les condiciones de vida de les prisioneros.

'42.553. Depués de Buchenwald' foi'l niciu de los reconocimientos en vida del polesu nel so país d'orixe, que yá tuviera nel d'adopción, onde foi condecoráu cola Legion d'Honneur, la de más rangu de la República Francesa. Fináu en mayu del 2019, con 94 años, el Gobiernu d'Asturies otorgó-y el mes pasáu la Medaya d'Oru d'Asturies a títulu póstumu "en reconocimientu a la so defensa de la democracia y los sos valores".

 

 

Contador Estadistiques