Feito pide esplicaciones sobre la oficialidá mientres evita aconceyar cola ALLA

“Como presidente de l’Academia de la Llingua Asturiana unvié-y per corréu certificáu dos solicitúes d’entrevista”, reveló Xosé Antón González Riaño en referencia a la polémica xenerada por Belarmino Feito sobre'l supuestu costu de la oficialidá. El cabezaleru de FADE nun respondió a nengún de los dos pidimientos.

“Toi a la espera”, confirmó’l na so cuenta de Twitter el tamién profesor universitariu, que considera que “asitiase a la escontra de la llingua y la cultura d'Asturies nun pue ser rentable política y socialmente. La co-oficialidá xenera bonos indicadores económicos ellí onde se pon en práutica. El presidente de la FADE sábelo de xuru”. La intención de González Riaño nesti alcuentru ye aldericar colos responsables de la patronal sobre la cuestión del asturianu y la oficialidá, al igual que vien celebrando con partíos políticos y organizaciones de toda triba, una bona oportunidá pa Feito pa entrugar por toles duldes qu’amosó’l llunes na presentación d’un telescopiu fechu pola so empresa, Asturfeito, na que taba presente’l presidente del país, Javier Fernández, y numberoses autoridaes.

Les pallabres de Feito, que, después de pidir a los partíos favoratibles esplicaciones sobre’l costu de la oficialidá, llegó a ironizar con que “quiciabes la especificación del próximu telescopiu tengamos que facela en bable”, tuvieron una repercusión amplia y llevó a la propia Federación Asturiana de Empresarios (FADA) a asoleyar ayeri un comunicáu sobre l’asuntu onde diz nun tar contra l’asturianu, pero nel qu’afirma que l’idioma yá cuenta "con una importante dotación presupuestaria" y un marcu llegal suficiente pal so caltenimientu, la Llei d’Usu. Una postura mui cercana, la de la patronal, a la que vien defendiendo’l Partido Popular (PP), formación que tamién evita aconceyar cola Academia de la Llingua Asturiana (ALLA).