Feito aprovecha la visita de Fernández p'amosar la so postura contraria a la oficialidá del asturianu

El presidente de FADE pide esplicaciones a los partíos sobre cuál va ser el so costu y atrávese a ironizar sobre l'usu del "bable" n'Asturfeito.

Javier Fernández acudió esta mañana a les instalaciones de la empresa n'Avilés pa la presentación del gran telescopiu pa rastreos sinópticos, entovía en fase de pruebes, que va instalase en Chile. Sicasí, Belarmino Feito, fundador d'Asturfeito y presidente de la Federación Asturiana de Empresarios (FADE), desvió l'atención del eventu hacia la oficialidá del asturianu y del gallego-asturiano.

Asina refirióse na so intervención a les eleiciones del añu qu'entra, demandando a los partíos que presenten les sos propuestes pa que tol mundu pueda valorales, señalando la cooficialidá como la que necesita más esplicaciones. Asina, entrugó, ensin citalos, a FSA, Podemos y IX cómo va ser esa oficialidá, si va afeutar a otres partíes presupuestaries de polítiques sociales y industriales, y qué va aportar.

D'igual forma, atrevióse a bromiar sobre l'asuntu señalando que "quiciabes la especificación del próximu telescopiu tengamos que facela en bable".

Na semeya, l'ex presidente d'Asturies, Vicente Álvarez Areces; el conseyeru d'Emplegu, Industria y Turismu, Isaac Pola; Feito; y Fernández, alderiquen frente al telescopiu. Imaxe obra d'Armando Álvarez.